കോഴിക്കോട്: വീട് പൊളിച്ചുനീക്കാന്‍ നോട്ടീസ് ലഭിച്ചിട്ടില്ലെന്ന് കെ.എം ഷാജി എംഎല്‍എ. നഗരസഭയില്‍ അന്വേഷിച്ചപ്പോഴും വിവരം ലഭിച്ചില്ല. വീട് നിര്‍മാണം പൂര്‍ത്തിയായിട്ടില്ലെന്നും ഇപ്പോഴത്തെ നീക്കങ്ങള്‍ രാഷട്രീയ പ്രേരിതമാണെന്നും ഷാജി ആരോപിച്ചു. കെട്ടിട നിര്‍മാണച്ചട്ട ലംഘിച്ചിട്ടില്ലെന്ന് പറഞ്ഞ ഷാജി വീട് പൊളിക്കുന്നത് തമാശയായി കാണുന്നുവെന്നും പരിഹസിച്ചു.
കെ.എം ഷാജി എംഎല്‍എയുടെ വീട് പൊളിച്ചുമാറ്റാന്‍ കോഴിക്കോട് കോര്‍പ്പറേഷനാണ് നോട്ടീസ് നല്‍കിയിരിക്കുന്നത്. പ്ലാനിലെ അനുമതിയെക്കാള്‍ വിസ്തീര്‍ണം കൂട്ടി വീട് നിര്‍മ്മിച്ചതായാണ് കോര്‍പ്പറേഷന്റെ കണ്ടെത്തല്‍. 32,00 ചതുരശ്ര അടിക്കാണ് കോര്‍പ്പറേഷനില്‍ നിന്ന് അനുമതി ലഭിച്ചത്. എന്നാല്‍ എംഎല്‍എയുടെ വീട് 5,500 ചതുരശ്ര അടിയിലധികം വിസ്തീര്‍ണം ഉണ്ടെന്നാണ് അളവെടുപ്പില്‍ കണ്ടെത്തിയത്. കഴിഞ്ഞ ദിവസമാണ് കെ.എം ഷാജിയുടെ വീട് അധികൃതര്‍ അളന്നത്.
കെ.എം ഷാജിയുടെ വീട് എത്ര വിലതിക്കുമെന്ന് റിപ്പോര്‍ട്ട് നല്‍കാന്‍ എന്‍ഫോഴ്സ്മെന്റ് ഡയറക്ടറേറ്റ് ആവശ്യപ്പെട്ടതിനെ തുടര്‍ന്നാണ് എക്സിക്യുട്ടീവ് എഞ്ചിനിയര്‍ രമേശ് കുമാറിന്റെ നേതൃത്വത്തിലുള്ള സംഘം മാലൂര്‍ക്കുന്നിന് സമീപത്തെ വീട് കഴിഞ്ഞ ദിവസം അളന്നത്. അനധികൃത സ്വത്ത് സമ്പാദനം നടത്തിയിട്ടുണ്ടോ എന്ന അന്വേഷണത്തിന്റെ ഭാഗമായാണ് വീടിന്റെ മതിപ്പുവില, വിസ്തീര്‍ണം, പൂര്‍ത്തിയാക്കിയ പ്ലാന്‍ എന്നിവ ഉള്‍പ്പെടുത്തി റിപ്പോര്‍ട്ട് നല്‍കാന്‍ ഇഡി ആവശ്യപ്പെട്ടത്. അഴീക്കോട് സ്‌കൂളില്‍ പ്ലസ് ടു ബാച്ച് അനുവദിക്കുന്നതിന് കെ.എം ഷാജി കോഴ വാങ്ങിയെന്ന പരാതിയില്‍ ഇഡി അന്വേഷണം ആരംഭിച്ച സാഹചര്യത്തിലാണ് ഇത്.
