തിരുവന്തപുരം: സംസ്ഥാനത്ത് ആകെ കോവിഡ് രോഗികളുടെ എണ്ണം അഞ്ചുലക്ഷം പിന്നിടുമ്പോള് ജാഗ്രത തുടരണമെന്ന മുന്നറിയിപ്പുമായി ആരോഗ്യമന്ത്രി കെ.കെ ശൈലജ ടീച്ചര്. ആകെ 5,02,712 പേര്ക്കാണ് സംസ്ഥാനത്ത് വൈറസ് ബാധ സ്ഥിരീകരിച്ചത്. കേരവലം രണ്ട് മാസംകൊണ്ടാണ് രോഗികളുടെ എണ്ണം അഞ്ച് ലക്ഷമായതെന്നും മന്ത്രി വ്യക്തമാക്കി.
അതേസമയം കോവിഡ് ബാധിതര് അഞ്ച് ലക്ഷം കടന്നപ്പോഴും മരണസംഖ്യ 1,771 മാത്രമാണ് എന്നത് ആശ്വാസം നല്കുന്നുവെന്നും മറ്റ് സംസ്ഥാനങ്ങളില് ഉയര്ന്ന മരണ നിരക്കുള്ളപ്പോള് കേരളത്തില് അത് 0.35 മാത്രമാണെന്നും ശൈലജ ടീച്ചര് പറഞ്ഞു. നിലവില് 4,22,410 പേര് കോവിഡില് നിന്ന് മുക്തരായിട്ടുണ്ട്. രോഗികളുടെ എണ്ണം കുറയുകയാണെങ്കിലും ജാഗ്രത തുടരണമെന്നും തീര്ത്ഥാടന കാലത്തും തെരഞ്ഞെടുപ്പ് കാലത്തും ഒട്ടും അലംഭാവം കാണിക്കരുതെന്നും മന്ത്രി വ്യക്തമാക്കി.
കഴിഞ്ഞ 10 മാസക്കാലമായി കോവിഡിനെതിരായ പ്രതിരോധത്തിലാണ് സംസ്ഥാനം. ഇന്ത്യയിലാദ്യമായി കോവിഡ് റിപ്പോര്ട്ട് ചെയ്തത് 2020 ജനുവരി 30 ന് ചൈനയിലെ വുഹാനില് നിന്നുവന്ന ഒരു വിദ്യാര്ത്ഥിയിലൂടെ കേരളത്തിലാണ്. എന്നാല് മറ്റ് പല സംസ്ഥാനത്തും രോഗബാധ കുതിച്ചുയര്ന്നപ്പോഴും പിടിച്ച് നില്ക്കാന് നമുക്കായി.
ആദ്യഘട്ടത്തില് 3 കേസുകളാണ് ഉണ്ടായത്. മേയ് 3 വരെയുള്ള രണ്ടാം ഘട്ടത്തില് 496 പേര്ക്കാണ് ആകെ രോഗം ബാധിച്ചത്. മേയ് 3 ന് ചികിത്സയിലുള്ളവരുടെ എണ്ണം 95 ആയി കുറയുകയും രോഗമുക്തി നേടിയവരുടെ എണ്ണം 401 ആയി ഉയരുകയും ചെയ്തു.
ലോക്ഡൗണ് മാറി മേയ് 4 ന് ചെക്പോസ്റ്റുകള് തുറന്നതോടെ മൂന്നാംഘട്ടത്തില് രോഗികളുടെ എണ്ണം പതിയെ വര്ധിച്ചു. തുടര്ന്ന് സംസ്ഥാനത്തിന്റെ വിവിധ ഭാഗങ്ങളില് ക്ലസ്റ്ററുകള് രൂപപ്പെട്ടു. ക്ലസ്റ്റര് സ്ട്രാറ്റജി ആവിഷ്ക്കരിച്ച് രോഗ നിയന്ത്രണത്തിന് സാധിച്ചു. പിന്നീട് ഓണം കഴിഞ്ഞുള്ള ആഴ്ചകളില് പ്രതിദിന രോഗികളുടെ എണ്ണം കൂടി 10,000 കഴിഞ്ഞു.
ഒരു ഘട്ടത്തില് ചികിത്സയിലുള്ളവരുടെ എണ്ണം 95,000വും കടന്നു. പ്രതിദിന രോഗികളുടെ എണ്ണം 30,000ന് മുകളില് ആകുമെന്ന് വിദഗ്ധര് മുന്നറിയിപ്പ് നല്കിയതാണ്. എന്നാല് എല്ലാവരും ജാഗ്രത പാലിച്ചതോടെ പ്രതിദിന രോഗികളുടെ എണ്ണം കുറയ്ക്കാനായി. ടെസ്റ്റ് പോസിറ്റിവിറ്റി നിരക്കും കുറയ്ക്കാന് സാധിച്ചു.
ആരില് നിന്നും കോവിഡ് പകരുന്ന അവസ്ഥയാണ് ഇപ്പോഴുമുള്ളത്. അതിനാല് ഓരോരുത്തരും വളരെയേറെ ശ്രദ്ധിക്കണം. തദ്ദേശ സ്വയംഭരണ തെരഞ്ഞെടുപ്പിലും മറ്റും എല്ലാവരും ആരോഗ്യ വകുപ്പ് നല്കുന്ന മാര്ഗനിര്ദേശങ്ങള് പാലിക്കണം. കൃത്യമായ സാമൂഹിക അകലം പാലിക്കുകയും മാസ്ക് ധരിക്കുകയും ഇടയ്ക്കിടയ്ക്ക് കൈകള് സോപ്പുപയോഗിച്ച് കഴുകുകയും വേണം. എല്ലാവരും ജാഗ്രത പാലിച്ചാല് കൂടുതല് വ്യാപനമുണ്ടാകാതെ പിടിച്ചുനിര്ത്താന് സാധിക്കുമെന്നും ആരോഗ്യ മന്ത്രി വ്യക്തമാക്കി.
