മലപ്പുറം: സംസ്ഥാനത്ത് വീണ്ടും കോവിഡ് മരണം സ്ഥീരികരിച്ചു. ഇത്തവണയും മരിച്ചതിന് ശേഷമാണ് രോഗബാധ സ്ഥിരീകരിച്ചിരിക്കുന്നത്. ചൊവ്വാഴ്ച തിരൂര്‍ പുറത്തൂര്‍ സ്വദേശി അബ്ദുള്‍ ഖാദറിനാണ്(70) രോഗം സ്ഥിരീകരിച്ചിരിക്കുന്നത്. ബെംഗളൂരുവില്‍ നിന്നെത്തി നിരീക്ഷണത്തില്‍ കഴിയുന്നതിനിടെയാണ് അബ്ദുള്‍ ഖാദറിന് മരണം സംഭവിക്കുന്നത്.
സ്വന്തം വീട്ടില്‍ ക്വാറന്‍റൈനില്‍ കഴിയുന്നതിനിടെ പനി ബാധിക്കുകയായിരുന്നു. തുടര്‍ന്ന് ആരോഗ്യ നില വഷളാവുകയും കുഴഞ്ഞുവീണ് മരിക്കുകയുമായിരുന്നു. മൃതദേഹം തിരൂര്‍ താലൂക്ക് ആശുപത്രിയില്‍ സൂക്ഷിച്ചിരിക്കുകയാണ്. അതേസമയം സംസ്ഥാനത്ത് മരണശേഷം കൊറോണ രോഗം സ്ഥിരീകരിക്കുന്നത് ഇപ്പോള്‍ വര്‍ധിച്ചുവരികയാണ്. ഇത് രോഗബാധയുടെ ഉറവിടം കണ്ടെത്തുതിന് ഏറെ പ്രയാസമുണ്ടാക്കും. കൂടാത മറ്റുള്ളവരിലേക്ക് കൂടുതലായി വ്യാപിക്കാനും കാരണമാകും.
