പ്രവാസി പുനരധിവാസ പദ്ധതിയായ എന്‍ഡിപിആര്‍ഇഎം പ്രകാരം ഇനി കേരളാ ബാങ്ക് വഴി പ്രവാസികള്‍ക്ക് വായ്പയെടുക്കാം. കേരളാബാങ്ക് നോര്‍ക്കാ റൂട്ട്സുമായി ഇതുമായി ബന്ധപ്പെട്ട ധാരണാപത്രം ഒപ്പുവച്ചു.
പദ്ധതിയുമായി സഹകരിക്കുന്ന ധനകാര്യസ്ഥാപനങ്ങളിലൂടെ പ്രവാസികള്‍ക്ക് ലഭിക്കുന്ന സേവനം ഇനിമുതല്‍ കേരള ബാങ്കിന്‍റെ 769 ശാഖകളിൽ കൂടി ലഭ്യമാകും. നിലവില്‍ 15 ധനകാര്യസ്ഥാപനങ്ങളിലെ 4,600 ശാഖകളിലൂടെയാണ് പ്രവാസികള്‍ക്ക് വായ്പാ സേവനങ്ങള്‍ ലഭ്യമാകുന്നത്. 30 ലക്ഷം രൂപവരെ ചെലവുള്ള പദ്ധതികൾക്ക് 15 ശതമാനം വരെ മൂലധന സബ്‌സിഡിയും കൃത്യമായ തിരിച്ചടവിന് ആദ്യ നാല് വർഷം 3 ശതമാനം പലിശ സബ്‌സിഡിയും നൽകും.
നാട്ടിലേക്ക് മടങ്ങിയെത്തിയ പ്രവാസികൾക്ക് സംരംഭകരാകാൻ സഹായം നൽകുന്ന എൻഡിപിആർഇഎം പദ്ധതി 2019-20 സാമ്പത്തികവർഷത്തില്‍ 1043 പേര്‍ക്കായി 53.43 കോടി രൂപയാണ് വായ്പ നൽകിയത്.
