തിരുവനന്തപുരം: സംസ്ഥാന ബജറ്റില്‍ ദേവസ്വം ബോര്‍ഡുകളില്‍ 150 കോടി രൂപ സഹായധനമായി പ്രഖ്യാപിച്ചത് ചരിത്രത്തില്‍ ആദ്യമാണെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. കഴിഞ്ഞ ബജറ്റില്‍ തിരുവിതാംകൂര്‍, കൊച്ചി ദേവസ്വം ബോര്‍ഡുകള്‍ക്ക് ധനസഹായമായി 118 കോടി രൂപ അനുവദിച്ചിരുന്നു. ബജറ്റില്‍ തിരുവിതാംകൂര്‍ ദേവസ്വം ബോര്‍ഡിന് 8 കോടി രൂപയും ശ്രീ പത്മനാഭസ്വാമി ക്ഷേത്രത്തിന് 2 കോടി രൂപയും വാര്‍ഷികധനസഹായമായി നല്‍കിയതും ചരിത്രത്തില്‍ ആദ്യമാണ്. മുന്‍പ് വാര്‍ഷിക ധനസഹായമായി തിരുവിതാംകൂര്‍ ദേവസ്വം ബോര്‍ഡിന് 80 ലക്ഷം രൂപയും ശ്രീപത്മനാഭസ്വാമിക്ഷേത്രത്തിന് 20 ലക്ഷം രൂപയുമാണ് അനുവദിച്ചു വന്നിരുന്നത്. ഇതാണ് 10 കോടി രൂപയായി വര്‍ദ്ധിപ്പിച്ചത്.
