കൊച്ചി: ഹൈക്കോടതി ജഡ്ജിയുടെ കാറിനു നേരെ കരി ഓയില്‍ പ്രയോഗം. ജസ്റ്റീസ് വി.ഷേര്‍സിയുടെ കാറിനു നേരെയാണ് ആക്രമണം ഉണ്ടായത്. ജസ്‌നയുടെ തിരോധാനം അന്വേഷിക്കണമെന്ന് ആവശ്യപ്പെട്ട് പ്ലക്കാര്‍ഡുമായി എത്തിയായിരുന്നു പ്രതിഷേധം. രാവിലെ ഹൈക്കോടതി ഗേറ്റിന് മുന്‍പിലാണ് സംഭവം. ഗേറ്റ് കടന്ന് വരികയായിരുന്ന കാറിനു നേരെ ഒരാള്‍ പാഞ്ഞുവരികയും കരി ഓയില്‍ ഒഴിക്കുകയുമായിരുന്നു.
കോട്ടയം എരുമേലി സ്വദേശി ആര്‍.രഘുനാഥന്‍ എന്നയാളാണ് കരി ഓയില്‍ ഒഴിച്ചത്. ഇയാളെ കസ്റ്റഡിയില്‍ എടുത്ത് ചോദ്യംചെയ്യുകയാണ്. കാഞ്ഞിരപ്പള്ളി സ്വദേശിനിയായ ജെസ്‌ന മരിയ ജയിംസിനെ കണ്ടെത്തണം എന്നാവശ്യപ്പെട്ടുള്ള ഹേബിയസ് കോര്‍പസ് ഹര്‍ജി അടുത്തിടെ പിന്‍വലിച്ചിരുന്നു. സാങ്കേതിക പിഴവുകള്‍ ഉള്ള ഹര്‍ജി തള്ളേണ്ടിവരും എന്ന് ഹൈക്കോടതി മുന്നറിയിപ്പ് നല്‍കിയത്തോടെ ആണ് ഹര്‍ജി പിന്‍വലിച്ചത്. ഈ ഹര്‍ജി പരിഗണിച്ചിരുന്നത് ജസ്റ്റീസ് വി.ഷേര്‍സിയായിരുന്നു
