രാജ്യത്തെ ലോക്ക്ഡൗണ്‍ നിയന്ത്രണങ്ങളില്‍ ഇളവുകള്‍ വരുത്തിയതോടെ ഇന്ത്യന്‍ സമ്പദ് വ്യവസ്ഥ സാധാരണ നിലയിലേക്ക് തിരിച്ചു വരുന്നുവെന്ന് റിസര്‍വ്വ് ബാങ്ക് ഗവര്‍ണര്‍ ശക്തി കാന്ത ദാസ്. ഇന്ത്യന്‍ സാമ്പത്തിക മേഖല പഴയ സ്ഥിതിയിലേക്ക് എത്തുന്നതിന്‍റെ സൂചനകള്‍ കണ്ടു തുടങ്ങിയെന്ന പ്രധാനമന്ത്രി നരേന്ദ്ര മോദിയുടെ പ്രസ്താവനയ്ക്ക് പിന്നാലെയാണ് ആര്‍ബിഐ ഗവര്‍ണറും ഇക്കാര്യം സൂചിപ്പിച്ച് രംഗത്തെത്തിയത്.
നിലവിലെ സാഹചര്യത്തില്‍ സമ്പദ് വ്യവസ്ഥയെ താങ്ങി നിര്‍ത്താന്‍ ആവശ്യമായ നിരവധി നടപടികള്‍ ആര്‍ബിഐ സ്വീകരിച്ചിട്ടുണ്ടെന്നും അദ്ദേഹം പറഞ്ഞു. ആര്‍ബിഐയുടെ പരമപ്രധാനമായ ലക്ഷ്യം രാജ്യത്തിന്‍റെ വളര്‍ച്ചയാണ്. അതുപോലെ സാമ്പത്തിക സ്ഥിരതയും ഒരേപോലെ പ്രധാനപ്പെട്ടതാണെന്നും അദ്ദേഹം പറഞ്ഞു. അതേസമയം കേന്ദ്ര സര്‍ക്കാര്‍ രാജ്യത്തിന്‍റെ സമ്പദ് വ്യവസ്ഥ തകര്‍ക്കുകയാണെന്ന വിമര്‍ശനവുമായി കോണ്‍ഗ്രസ്സ് നേതാവ് രാഹുല്‍ ഗാന്ധി നേരത്തെ രംഗത്തെത്തിയിരുന്നു.
സമ്പദ് വ്യവസ്ഥയെ പുനരുജ്ജീവിപ്പിക്കാന്‍ ജനങ്ങള്‍ക്കും ചെറുകിട വ്യവസായങ്ങള്‍ക്കും പണം കൈമാറാന്‍ സര്‍ക്കാര്‍ തയ്യാറാവുന്നില്ലെന്നായിരുന്നു രാഹുല്‍ ഗാന്ധിയുടെ വിമര്‍ശനം.
