മസ്‌കറ്റ്: കുവൈറ്റില്‍ കൊവിഡ് വ്യാപനം അതി രൂക്ഷമായി തുടരുന്ന സാഹചര്യത്തില്‍ രണ്ട് ആഴ്ചത്തേക്ക് കൂടി ഭാഗിക കര്‍ഫ്യു ഏര്‍പ്പെടുത്തണമെന്ന നിര്‍ദേശവുമായി ആരോഗ്യ മന്ത്രി ബാസില്‍ അല്‍ സബാഹ്. രാത്രി 9 മണി മുതല്‍ പുലര്‍ച്ചെ നാലുമണിവരെ കര്‍ഫ്യൂ ഏര്‍പ്പെടുത്തണമെന്നാണ് നിര്‍ദ്ദേശം. ഇതു സംബന്ധിച്ച് കൂടുതല്‍ നിര്‍ദേശങ്ങള്‍ അദേഹം മന്ത്രി സഭ യോഗത്തില്‍ മുന്നോട്ടു വെച്ചു.
കോവിഡ് രൂക്ഷമാകുന്ന ഗവര്‍ണറേറ്റില്‍ ലോക്ക് ഡൗണ്‍ ഏര്‍പ്പെടുത്തുക, രാജ്യത്ത് നിന്നും തിരിച്ചുമുള്ള വാണിജ്യ വിമാന സര്‍വീസുകള്‍ നിര്‍ത്തലാക്കുക, ഷോപ്പിംഗ് കോംപ്ലക്‌സുകള്‍, വാണിജ്യ സമുച്ചയങ്ങള്‍,ആരോഗ്യ കേന്ദ്രങ്ങള്‍ മുതലായ ജനങ്ങള്‍ കൂടിച്ചേരുന്ന സ്ഥാപനങ്ങളുടെ പ്രവര്‍ത്തനം നിര്‍ത്തി വയ്ക്കുക, റസ്റ്റോറന്റുകളില്‍ അകത്തിരുന്ന് ഭക്ഷണം കഴിക്കുന്നത് നിര്‍ത്തലാക്കി ഹോം ഡെലിവറി സേവനമായി മാത്രം പരിമിതപ്പെടുത്തുക,തുടങ്ങിയ ആവശ്യങ്ങളും ആരോഗ്യ മന്ത്രാലയം യോഗത്തില്‍ പറഞ്ഞു.
വാണിജ്യ കേന്ദ്രങ്ങള്‍ ഉള്‍പ്പെടെ ജനങ്ങള്‍ കൂടിച്ചേരുന്ന സ്ഥാപനങ്ങളുടെ പ്രവര്‍ത്തന സമയം രാവിലെ പത്തുമുതല്‍ രാത്രി എട്ടുവരെയായി കുറക്കുക എന്ന നിര്‍ദ്ദേശം പരിഗണനയിലുണ്ട്.
റെസ്റ്റോറന്റുകളില്‍ മുന്‍കൂര്‍ അപ്പോയ്ന്റ്‌മെന്റ് സംവിധാനം ഏര്‍പ്പെടുത്തുക, പ്രവര്‍ത്തന സമയം രാത്രി ഒന്‍പതുമണിവരെയായി പരിമിതപ്പെടുത്തുക, ഹെല്‍ത്ത് ക്ലബുകളില്‍ പ്രവേശിക്കുന്നതിന് അപ്പോയ്ന്റ്‌മെന്റ് സംവിധാനം ഏര്‍പ്പെടുത്തുക, കോവിഡ് മാനദണ്ഡങ്ങള്‍ പാലിക്കാതെ പ്രവര്‍ത്തിക്കുന്ന സ്ഥാപനങ്ങള്‍ മൂന്ന് ദിവസത്തേക്ക് അടച്ചു പൂട്ടുക, നിയമ ലംഘനം വീണ്ടും ആവര്‍ത്തിച്ചാല്‍ വന്‍ പിഴ ചുമത്തുക, മാസ്‌ക് ധരിക്കാത്തവര്‍ക്കെതിരെ അടിയന്തിര പിഴ ചുമത്തുക എന്നിവയാണ് മറ്റു നിര്‍ദേശങ്ങള്‍
