സ്വര്‍ണ്ണക്കടത്ത് കേസിലെ മൂന്നാംപ്രതി ഫൈസല്‍ ഫരീദിനെ യുഎഇയില്‍ നിന്നു വിട്ടു കിട്ടാന്‍ ബ്ലൂ നോട്ടീസ് പുറപ്പെടുവിക്കാനൊരുങ്ങി എന്‍ഐഎ. ബ്ലൂ നോട്ടീസ് പുറപ്പെടുവിക്കുന്നതിലൂടെ എന്‍ഐഎ ഇന്‍റര്‍ പോളിന്‍റെ സഹായം തേടുകയാണ്. കുറ്റവാളിയെന്ന് സംശയിക്കുന്ന ആളുടെ കൂടുതല്‍ വിവരങ്ങള്‍ ശേഖരിക്കുന്നതിനാണ് ബ്ലൂ നോട്ടീസ് നല്‍കുന്നത്.
കേസിലെ പ്രധാന കണ്ണിയാണ് ഫൈസല്‍ ഫരീദെന്നാണ് എന്‍ഐഎ പറയുന്നത്. കഴിഞ്ഞ ദിവസമാണ് ഫൈസലിനെ കേസില്‍ പ്രതി ചേര്‍ക്കുന്നത്. തൊട്ടുപിന്നാലെ ഫൈസല്‍ ഫരീദിന്‍റെ ചിത്രങ്ങളും പുറത്തു വന്നിരുന്നു. എന്നാല്‍ ഫൈസലിനെ പ്രതി ചേര്‍ത്തുളള വാര്‍ത്തകള്‍ വന്നതിനു തൊട്ടു പിന്നാലെ പ്രതികരണവുമായി ഫൈസല്‍ എത്തിയിരുന്നു. എന്‍ഐഎ അന്വേഷിക്കുന്ന ഫൈസല്‍ ഫരീദ് താനല്ലെന്നും സ്വര്‍ണ്ണക്കടത്തുമായി തനിക്ക് യാതൊരു ബന്ധവുമില്ലെന്നും ഫൈസല്‍ ഫരീദ് മാധ്യമങ്ങളോട് പറഞ്ഞു.
എന്നാല്‍ യുഎഇ കോണ്‍സുലേറ്റില്‍ നിന്നുളള വിവരത്തിന്‍റെ അടിസ്ഥാനത്തിലാണ് സ്വര്‍ണ്ണക്കടത്ത് കേസില്‍ ഫൈസല്‍ ഫരീദിനെ പ്രതിയാക്കിയതെന്ന് എന്‍ഐഎ പറഞ്ഞു. കോണ്‍സുലേറ്റ് ചുമതലുളള ഉദ്യോഗസ്ഥനില്‍ നിന്നാണ് ഫൈസലിന്‍റെ മേല്‍വിലാസം ലഭിച്ചതെന്ന് എന്‍ഐഎ. നയതന്ത്ര ബാഗേജ് വഴി സ്വര്‍ണ്ണം അയച്ചത് തൃശ്ശൂര്‍ കയ്പമംഗലം സ്വദേശി ഫൈസലിന്‍റെ മേല്‍വിലാസത്തിലായിരുന്നു. കൂടാതെ സ്വര്‍ണ്ണം അയക്കാനുപയോഗിച്ച ഐഡി നമ്പറും കോണ്‍സുലേറ്റ് എന്‍ഐഎയ്ക്ക് കൈമാറി. കസ്റ്റംസിന്റെ പ്രാഥമിക റിപ്പോര്‍ട്ട് പ്രകാരമാണ് എഫ്‌ഐആറില്‍ എറണാകുളം സ്വദേശിയെന്ന് രേഖപ്പെടുത്തിയതെന്നും എന്‍ഐഎ അറിയിച്ചു. ഇക്കാര്യങ്ങളെല്ലാം എന്‍ഐഎ കോടതിയെ അറിയിക്കുകയും ചെയ്തു. അതേസമയം കേരളത്തിലെ വിവിധ വിമാനത്താവളങ്ങള്‍ വഴി നടന്ന സ്വര്‍ണ്ണക്കടത്ത് കേസുകള്‍ കൂടി എന്‍ഐഎ ഏറ്റെടുക്കും.
