ന്യൂഡല്‍ഹി: വിവാദ കാര്‍ഷിക നിയമങ്ങള്‍ക്കെതിരെ സമരം ചെയ്യുന്ന കര്‍ഷകരുമായി കേന്ദ്ര സര്‍ക്കാര്‍ ഇന്ന് വീണ്ടും ചര്‍ച്ച നടത്തും. കര്‍ഷകരെ അനുനയിപ്പിക്കാനുള്ള കേന്ദ്രത്തിന്റെ പത്താംവട്ട ചര്‍ച്ചയാണ് ഇന്ന്. വിഗ്യാന്‍ ഭവനില്‍ ഉച്ചക്ക് 2 മണിക്കാണ് ചര്‍ച്ച.
നിയമങ്ങള്‍ പിന്‍വലിക്കാന്‍ കഴിയില്ലെന്നും ഭേദഗതികള്‍ ചര്‍ച്ച ചെയ്യണമെന്നുമാണ് കേന്ദ്രത്തിന്റെ നിലപാട്. എന്നാല്‍ നിയമങ്ങള്‍ പിന്‍വലിക്കാതെ വിശദമായ ചര്‍ച്ചയ്ക്കില്ലെന്ന നിലപാടില്‍ ഉറച്ചു നില്‍ക്കുകയാണ് കര്‍ഷക സംഘടനകള്‍.
അതേസമയം കാര്‍ഷിക നിയമങ്ങള്‍ പഠിക്കാന്‍ സുപ്രീംകോടതി നിയോഗിച്ച വിദഗ്ധ സമിതി ഇന്ന് മുതല്‍ കര്‍ഷകരമായി കൂടിക്കാഴ്ച നടത്തും. സമിതി അംഗങ്ങള്‍ പക്ഷപാതമുള്ളവരാണെന്ന് ചിന്തിക്കരുതെന്നും തുറന്ന മനസോടെ സമിതിയുമായി കര്‍ഷകര്‍ സഹകരിക്കണമെന്നും അംഗങ്ങള്‍ ആവശ്യപ്പെട്ടിട്ടുണ്ട്.
എന്നാല്‍ നിയമത്തെ എതിര്‍ക്കുന്ന കര്‍ഷക സംഘടനകള്‍ സമിതിയുമായി സഹകരിക്കില്ല. സമിതി അംഗങ്ങളെ മുഴുവന്‍ ഒഴിവാക്കണമെന്ന ആവശ്യവുമായി ഭാരതീയ കിസാന്‍ യൂണിയന്‍ ലോക് ശക്തി സുപ്രീംകോടതിയെ സമീപിച്ചിട്ടുണ്ട്.
