കോലാലംപൂര്: മലേഷ്യയിലെ വിവാദമായ വണ്എംഡിബി കുംഭകോണ കേസില് മലേഷ്യന് മുന്പ്രധാനമന്ത്രി നജീബ് റസാഖ് കുറ്റക്കാരനെന്ന് കോടതി. മലേഷ്യയുടെ പൊതുവികസന ഫണ്ടായ വണ് മലേഷ്യ ഡെവലപ്മെന്റ് ബെര്ഹാദില് നിന്ന് 4.5 ബില്യണ് യുഎസ് ഡോളര് (7400 കോടിരൂപ) തട്ടിപ്പ് നടത്തിയെന്നാണ് കേസ്. രാഷ്ട്രീയ പ്രേരിതമാണ് തനിക്ക് എതിരെയുള്ള കേസെന്ന് വാദിക്കുന്ന നജീബ്, അപ്പീല് നല്കുമെന്നും പ്രതികരിച്ചു.അധികാര ദുര്വിനിയോഗം, വിശ്വാസ വഞ്ചന, കള്ളപ്പണം വെളുപ്പിക്കല് തുടങ്ങിയ കുറ്റങ്ങളാണ് 67 വയസ്സുകാരനായ നജീബിന് എതിരെ ചുമത്തിയിട്ടുള്ളത്. ജഡ്ജി മുഹമ്മദ് നസ്ലാന് ഗസാലി രണ്ടു മണിക്കൂറെടുത്താണ് വിധിന്യായം വായിച്ചത്.
തനിക്കെതിരായ കേസ് രാഷ്ട്രീയ പ്രേരിതമാണെന്നാണ് അറുപത്തേഴുകാരനായ നജീബ് ആരോപിക്കുന്നത്. അധികാര ദുര്വിനിയോഗം, വിശ്വാസ വഞ്ചന, കള്ളപ്പണം വെളുപ്പിക്കല് തുടങ്ങിയ കുറ്റങ്ങളാണ് നജീബിനെതിരേയുള്ളത്. പ്രോസിക്യൂഷന് ഉന്നയിച്ച വാദങ്ങള്ക്ക് തൃപ്തികരമായ മറുപടി നല്കാന് നജീബിനായില്ലെന്ന് ജഡ്ജി ചൂണ്ടിക്കാട്ടി. സ്വന്തം കാര്യങ്ങള്ക്കായി ഫണ്ട് ദുരുപയോഗം നടന്നുവെന്ന് സംശയാതീതമായി പ്രോസിക്യൂട്ടര്മാര് തെളിയിച്ചിട്ടുണ്ടെന്നും കോടതി അറിയിച്ചു.
നജീബ് റസാഖിന്റെ നേതൃത്വത്തില് 2009ല് ആണ് വണ്എംഡിബി എന്ന പേരില് ഫണ്ട് രൂപീകരിക്കുന്നത്. മലേഷ്യയുടെ സാമ്പത്തികപുരോഗതിക്ക് വേണ്ടി ഫണ്ട് ഉപയോഗിക്കുകയായിരുന്നു ലക്ഷ്യം. നജീബ് ഇത് വകമാറ്റി ചെലവഴിച്ചു എന്നാണ് ആരോപണം. യുഎസ് അന്വേഷണ ഏജന്സികളുടെ കണക്കില് ഏതാണ്ട് 7400 കോടിരൂപയോളം അഴിമതിയാണ് നടന്നിട്ടുള്ളത്.നജീബിന്റെ പേരിലുള്ള ബാങ്ക് അക്കൗണ്ടുകളില് മാത്രം 700 ദശലക്ഷം യുഎസ് ഡോളര് എത്തിയെന്നാണ് അന്വേഷണത്തില് വ്യക്തമായത്. നജീബിന്റെ ഭാര്യയും ഉന്നത സര്ക്കാര് ഉദ്യോഗസ്ഥരും അഴിമതിയുടെ ഭാഗമായെന്നാണ് കണ്ടെത്തല്.
