ഡല്‍ഹി: പ്രധാനമന്ത്രി നരേന്ദ്രമോദിയുടെ മന്‍ കി ബാത്തിന് യൂ ട്യൂബില്‍ ലഭിച്ചത് ലൈക്കുകളെക്കാള്‍ ഏറെ ഡിസ്‌ലൈക്കുകള്‍. യൂട്യൂബില്‍ ഓള്‍ ഇന്ത്യ റേഡിയോയും ബിജെപിയും കഴിഞ്ഞ ദിവസം അപ്‌ലോഡ് ചെയ്ത മന്‍ കി ബാത്ത് ഷോയ്ക്കാണ് ഡിസ്‌ലൈക്കുള്‍ ലഭിച്ചത്. ഇതിനു പിന്നില്‍ കോണ്‍ഗ്രും രാഹുല്‍ ഗാന്ധിയുമാണെന്നാണ് ബിജെപിയുടെ ആരോപണം.
വീഡിയോയ്ക്ക് ഡിസ്‌ലൈക്ക് ലഭിച്ചത് കോണ്‍ഗ്രസ് ആഘോഷിക്കുകയാണെന്നും എന്നാല്‍ യൂ ട്യൂബ് ഡാറ്റാ പ്രകാരം ഇന്ത്യയില്‍ നിന്ന് രണ്ട് ശതമാനം ഡിസ്‌ലൈക്ക് മാത്രമാണ് ലഭിച്ചതെന്നും ബിജെപി ഐടി സെല്‍ തലവന്‍ മാളവ്യ പറഞ്ഞു.
അപ്‌ലോഡ് ചെയ്ത് മണിക്കൂറുകള്‍ പിന്നിട്ടപ്പോള്‍ രണ്ടര ലക്ഷത്തിലധികം ഡിസ് ലൈക്കാണ് വീഡിയോയ്ക്ക് ലഭിച്ചത്. വീഡിയോയ്ക്ക് താഴെ വന്നിരിക്കുന്ന കമന്റുകള്‍ ഭൂരിഭാഗവും കോവിഡ് കാലത്ത് ജെഇഇ, നീറ്റ് പരീക്ഷകള്‍ നടത്തുന്നതിനെതിരെ ഉള്ള വിദ്യാര്‍ത്ഥികളുടെ പ്രതിഷേധങ്ങളുമാണ്.
അതേസമയം ജെഇഇ, നീറ്റ് പരീക്ഷ നടത്തുന്നതിനെതിരെ നിരവധി കമന്റുകള്‍ വന്നത് വിദേശത്തുനിന്നാണെന്ന് ബിജെപി ആരോപിച്ചു. 98 ശതമാനം ഡിസ്‌ലൈക്കുകളും ഇന്ത്യക്ക് പുറത്തുനിന്നാണ് വന്നത്. രാഹുല്‍ ഗാന്ധിയുടെ പ്രിയപ്പെട്ട തുര്‍ക്കിയില്‍ നിന്നാണ് ഡിസ്‌ലൈക്കുകള്‍ വരുന്നത്. എന്താണ് രാഹുല്‍ ഗാന്ധിക്ക് തുര്‍ക്കിയോട് ഇത്ര അടുപ്പമെന്നും ബിജെപി ഐടി സെല്‍ തലവന്‍ മാളവ്യ ചോദിച്ചു.
