തിരുവനന്തപുരം: ഓണത്തിന് ശേഷം സംസ്ഥാനത്ത് കോവിഡ് വ്യാപനം രൂക്ഷമായെന്ന് അരോഗ്യ വകുപ്പ്. ആറ് ജില്ലകളില്‍ രോഗം സ്ഥിരീകരിക്കുന്നവരുടെ എണ്ണം കൂടിയിട്ടുണ്ടെന്നാണ് റിപ്പോര്‍ട്ട്. കോവിഡ് വ്യാപനം രൂക്ഷമായതിനാല്‍ ലക്ഷണങ്ങള്‍ സ്വയം തിരിച്ചറിഞ്ഞ് ആളുകള്‍ പരിശോധനക്ക് വിധേയരാകണമെന്ന് ആരോഗ്യ വകുപ്പ് ആവശ്യപ്പെട്ടു. ഈ സാഹചര്യത്തില്‍ പ്രാദേശിക തലത്തില്‍ ആരോഗ്യ പ്രവര്‍ത്തകരുടെ കാര്യക്ഷമത വര്‍ധിപ്പിക്കണമെന്നും ആരോഗ്യ വകുപ്പ് നിര്‍ദേശിച്ചു.
ഓണത്തോടനുബന്ധിച്ച് ആളുകള്‍ കൂടുതല്‍ അടുത്തിടപഴകാനും അതിലൂടെ രോഗവ്യാപനം വര്‍ധിക്കാനും സാധ്യതയുണ്ടെന്ന് സര്‍ക്കാര്‍ നേരത്തെ അറിയിച്ചിരുന്നു. സര്‍ക്കാരിന്റെ ഈ കണക്കുകൂട്ടലുകള്‍ ശരിവെക്കുന്നവയാണ് ഓണത്തിന് ശേഷമുളള കോവിഡ് കണക്കുകള്‍.
തിരുവനന്തപുരം, കൊല്ലം, കോട്ടയം, കണ്ണൂര്‍, കാസര്‍ഗോഡ് ജില്ലകളില്‍ രോഗം സ്ഥിരീകരിക്കുന്നവരുടെ നിരക്ക് മുന്‍ ആഴ്ചകളേക്കാള്‍ വര്‍ധിച്ചിട്ടുണ്ട്. കൂടാതെ പരിശോധനക്ക് വിധേയമാകുന്നവരില്‍ പോസിറ്റീവ് ആകുന്നവരുടെ തോതും കൂടിയിട്ടുണ്ട്. തിരുവനന്തപുരത്ത് 9.9 ല്‍ നിന്നും 13.6 ശതമാനമായും കണ്ണൂരില്‍ 8.2 ല്‍ നിന്നും 12.6 ശതമാനമായുമാണ് വര്‍ധിച്ചത്. അതേസമയം കൊല്ലം, ഇടുക്കി ജില്ലകളില്‍ രോഗ വ്യാപന തോത് കുറഞ്ഞിട്ടുണ്ട്.
