ന്യൂഡല്‍ഹി: വോളണ്ടറി റിട്ടയര്‍മെന്റ് എടുത്ത ജീവനക്കാര്‍ക്ക് പണം നല്‍കാന്‍ ധനകാര്യ മന്ത്രാലയത്തിന്റെ സഹായം തേടി വാണിജ്യ മന്ത്രാലയം. മെറ്റല്‍സ് ആന്റ് മിനറല്‍സ് ട്രേഡിങ് കോര്‍പറേഷന്‍ ഓഫ് ഇന്ത്യയില്‍ നിന്ന് വിആര്‍എസ് എടുത്തവര്‍ക്കാണ് പണം നല്‍കാനുള്ളത്. ഇതിനായി ധനകാര്യ മന്ത്രാലയത്തിന് കത്തയച്ചതായി ഉന്നത വൃത്തങ്ങളെ ഉദ്ധരിച്ച് ദേശീയ മാധ്യമം റിപ്പോര്‍ട്ട് ചെയ്തു.
സാമ്പത്തികമായി കടുത്ത പ്രതിസന്ധിയിലാണ് ഈ പൊതുമേഖലാ സ്ഥാപനം ഉള്ളത്. അതിനാല്‍ തന്നെ വോളണ്ടറി റിട്ടയര്‍മെന്റ് എടുക്കുന്ന ജീവനക്കാര്‍ക്ക് പ്രതിഫലം നല്‍കാനുള്ള സാമ്പത്തിക ശേഷി പോലും കമ്പനിക്കില്ലെന്നാണ് വിവരം. ധനകാര്യ മന്ത്രാലയം തങ്ങളുടെ ആവശ്യം അനുകൂലമായി പരിഗണിക്കുമെന്ന വലിയ പ്രതീക്ഷയിലാണ് വാണിജ്യ മന്ത്രാലയം. 2020 ജൂലൈയിലായിരുന്നു ജീവനക്കാര്‍ക്ക് വിആര്‍എസ് നടപ്പിലാക്കാന്‍ എംഎംടിസിയുടെ മേധാവികള്‍ തീരുമാനിച്ചത്.
