കെ.അരവിന്ദ്‌
ഔഷധ ഉല്‍പ്പാദന രംഗത്തെ പ്രമുഖ കമ്പനിയാണ്‌ സിപ്ല. ഔഷധങ്ങളും ഔഷധ ചേരുവകളും ഉല്‍പ്പാദിപ്പിക്കുന്ന ഈ ബയോ ടെക്‌നോളജി കമ്പനിക്ക്‌ ഇന്ത്യയിലും യുഎസിലും ദക്ഷിണ ആഫ്രിക്കയിലും മറ്റ്‌ രാജ്യങ്ങളിലും സാന്നിധ്യമുണ്ട്‌.
കോവിഡ്-19 മൂലം ജനറിക്‌ മരുന്നുകള്‍ക്ക്‌ വലിയ ഡിമാന്റ്‌ ആണ്‌ ആഗോള തലത്തില്‍ ഉണ്ടായിരിക്കുന്നത്‌. ഈ ഡിമാന്റ്‌ പ്രയോജനപ്പെടുത്താന്‍ സജ്ജമാണ്‌ സിപ്ല. നിലവില്‍ കോറോണ വൈറസ്‌ ബാധിതര്‍ക്ക്‌ ഉപയോഗിക്കുന്ന മരുന്നുകളുടെ ഉല്‍പ്പാദനത്തില്‍ സജീവമാണ്‌ സിപ്ല. എച്ച്‌ഐവി തുടങ്ങിയ വൈറസുകള്‍ക്കുള്ള മരുന്നുകളും കമ്പനി ഗണ്യമായി ഉല്‍പ്പാദിപ്പിക്കുന്നുണ്ട്‌.
പൊതുവെ ഫാര്‍മ ഓഹരികള്‍ വിപണിയുടെ പൊതുഗതിയില്‍ നിന്ന്‌ വ്യത്യസ്‌തമായ പ്രകടനം കാഴ്‌ച വെക്കാന്‍ സാധ്യതയുണ്ട്‌. ഔഷധങ്ങള്‍ക്കുള്ള ഡിമാന്റ്‌ വര്‍ധിച്ചതും രൂപയുടെ മൂല്യം ശോഷിച്ചതും ഫാര്‍മ കമ്പനികള്‍ക്ക്‌ അനുകൂലമായ ഘടകങ്ങളാണ്‌.
പൊതുവെ ഇപ്പോഴത്തെ മാര്‍ക്കറ്റില്‍ എഫ്‌എംസിജി, ഫാര്‍മ തുടങ്ങിയ ഡിഫന്‍സീവ്‌ സെക്‌ടറുകളില്‍ നിക്ഷേപം നടത്തുന്നതിന്‌ നിക്ഷേപകര്‍ മുന്നോട്ടുവരുന്നതാണ്‌ കാണുന്നത്‌. ഈ രീതി സിപ്ല പോലുള്ള ഓഹരികളുടെ വില ഉയരുന്നതിന്‌ വഴിവെക്കുന്ന ഘടകമാണ്‌.
ജനറിക്‌ മരുന്നുകളുടെ ഉല്‍പ്പാദനത്തില്‍ ഇന്ത്യ വലിയൊരു ശക്തിയാണ്‌. ലോകത്തിലെ ഒരു രാജ്യത്തിനും ജനറിക്‌ മരുന്നുകളുടെ ഡിമാന്റ്‌ ഉയരുമ്പോള്‍ ഇന്ത്യന്‍ ഫാര്‍മ കമ്പനികളെ അവഗണിക്കാനാകില്ല. അതുകൊണ്ടുതന്നെ അടുത്ത വര്‍ഷങ്ങളിലും ഫാര്‍മ ഓഹരികള്‍ മികച്ച പ്രകടനം കാഴ്‌ച വെക്കാനാണ്‌ സാധ്യത.
