ഡല്‍ഹി: കോവാക്‌സിന്‍ സ്വീകരിച്ച ഹരിയാന മന്ത്രിക്ക് കോവിഡ് സ്ഥിരീകരിച്ച സാഹചര്യത്തില്‍ വിശദീകരണവുമായി വാക്‌സിന്‍ നിര്‍മ്മാണ കമ്പനി ബയോടെക്ക്. 28 ദിവസത്തെ ഇടവേളയില്‍ 2 ഡോസ് എടുക്കുമ്പോഴാണ് വാക്‌സിന്റെ ഫലം ഉണ്ടാവുക കോവിഡ് സ്ഥിരീകരിച്ച ഹരിയാന മന്ത്രി അനില്‍ വിജ് ആദ്യ ഡോസ് മാത്രമേ എടുത്തിരുന്നുള്ളൂവെന്ന് ബയോടെക്ക് പറഞ്ഞു. രണ്ടാമത്തെ ഡോസ് എടുത്ത് 14 ദിവസം കഴിഞ്ഞാല്‍ മാത്രമേ വാക്‌സിന്റെ ഫലം അറിയാന്‍ കഴിയൂ എന്ന് ബയോടെക്ക് പറഞ്ഞു.
അംബാല കന്റോണ്‍മെന്റ് ആശുപത്രിയില്‍ ചികിത്സയിലാണ് മന്ത്രിയിപ്പോള്‍. താനുമായി അടുത്ത സമ്പര്‍ക്കം പുലര്‍ത്തിയ വ്യക്തികള്‍ കോവിഡ് പരിശോധനക്ക് വിധേയരാകണമെന്ന് മന്ത്രി അഭ്യര്‍ഥിച്ചു. മൂന്നാംഘട്ട കോവാക്‌സിന്‍ പരീക്ഷണത്തിന്റെ ഭാഗമായി നവംബര്‍ 20നാണ് അനില്‍ വിജ് കോവിഡ് വാക്‌സിന്‍ എടുത്തത്.
I have been tested Corona positive. I am admitted in Civil Hospital Ambala Cantt. All those who have come in close contact to me are advised to get themselves tested for corona.
— ANIL VIJ MINISTER HARYANA (@anilvijminister) December 5, 2020
ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ചും (ഐ.സി.എം.ആര്‍) ഭാരത് ബയോടെകും സംയുക്തമായാണ് കോവാക്‌സിന്‍ വികസിപ്പിക്കുന്നത്. നേരത്തെ വാക്‌സിന്‍ പരീക്ഷണത്തിന്റെ ആദ്യ രണ്ട് ഘട്ടങ്ങള്‍ വിജയകരമായി പുര്‍ത്തിയാക്കിയതായി നിര്‍മാതാക്കള്‍ വ്യക്തമാക്കിയിരുന്നു.
