Web Desk
ഭാര്യ കഴിഞ്ഞാൽ സോണിക്ക് ഏറ്റവും പ്രിയപ്പെട്ടത് അഡീനിയം പുഷ്പമാണത്രെ ! കേട്ടിട്ട് വിശ്വാസം വരുന്നില്ലല്ലേ ! എങ്കിൽ എറണാകുളത്തുള്ള അവരുടെ ചെറായിലെ കോരാശ്ശേരി വീട്ടിലേക്ക് ഒന്നു പോയി നോക്കണം. മരുഭൂമിയിലെ പനിനീർ പുഷ്പം പൂത്തു തളിർത്തു നിൽക്കുന്നത് കണ്ണെടുക്കാതെ നോക്കി നിന്നു പോകും. ഉദ്യാന പ്രേമികൾ ആണെങ്കിൽ പിന്നെ പറയേ വേണ്ട. വീട്ടുവളപ്പിലും മട്ടുപ്പാവിലുമായി നൂറോളം ഇനങ്ങളിൽ അയ്യായിരത്തോളം അഡീനയം പുഷ്പങ്ങൾ തീർക്കുന്നത് കൺ മുന്നിൽ നിറവസന്തം.
മട്ടുപ്പാവിൽ രണ്ടിടത്തായി രണ്ടായിരത്തോളം ചെടികളുണ്ട്.ബാക്കിയുള്ളവ താഴെ വീടിനു ചുറ്റും ചെടിച്ചട്ടിയിൽ. കേരളാ ഇലക്ട്രോണിക് ആന്റ് എന്ജിനീയറിംഗ് ലിമിറ്റഡ്( കെ ) ജീവനക്കാരനായ സോണി പണ്ടേ ഉദ്യാന പ്രേമിയായിരുന്നു. എവിടെ പോയാലും ആദ്യം നോക്കുക ചെടികൾ. നാൾക്കുനാൾ ആ കമ്പം ഏറി വന്നപ്പോൾ പറവൂർ സെയിൽസ് ടാക്സ് ഓഫീസർ ഭാര്യ മിനിയും ഗ്രീൻ ഹൗസിന് പച്ചക്കൊടി കാണിച്ചു.
ഇരുപത് വര്ഷം മുമ്പ് തായ്ലന്റിൽ നിന്നും വരുത്തിച്ചതാണ് തുടക്കം . പിന്നീട് തൃശൂര് മണ്ണുത്തിയിൽ നിന്നും കുറച്ച് ചെടികള് വാങ്ങി. ഗ്രാഫ്റ്റ് ചെയ്തും വിത്ത് മുളപ്പിച്ചുമാണ് പുതിയതൈകള് രൂപപ്പെടുത്തിയത് . വിത്തുമുളപ്പിച്ചാൽ പൂവിടാന് സമയമെടുക്കും. അതേ സമയം ഗ്രാഫ്റ്റിംഗ് ആണെങ്കിൽ നാലുമാസത്തിനുള്ളിൽ പൂവുണ്ടാകുമെന്ന് രണ്ട് പതിറ്റാണ്ടിലധികമായി അഡീനിയം പുഷ്പ്പങ്ങൾ പരിപാലിക്കുന്ന സോണി പറയുന്നു.അങ്ങനെ പതിയെ അഡീനിയം വളർത്തൽ വിപുലപ്പെടുത്തി.
മരുഭൂമി സസ്യത്തിന്റെ ഇനത്തിൽപ്പെട്ട അഡീനിയത്തിനു വെള്ളം നന ആഴ്ചയിൽ ഒരിക്കൽ മതി. ബോണ്സായി രൂപത്തിലുള്ള ഈ ചെടിയുടെ കടഭാഗം തടിച്ച് ഉരുണ്ടതാണ് . ഇവിടെ വെള്ളം സംഭരിക്കുന്നതിലാണ് എപ്പോഴും നന വേണ്ടാത്തത്. അതേ പോലെ ഇതിനു വളവും വേണ്ട. 60 ശതമാനം മണലും ബാക്കി ചകിരിച്ചോറും നിറച്ച് കവറിലാണ് ഇത് നട്ട് പിടിപ്പിക്കുന്നത്. വലുതാകുന്നതനുസരിച്ച് ചട്ടിയിലേക്ക് മാറ്റണം. ഇതിന്റെ പൂക്കള് ഇളം റോസ്, ചുവപ്പ്, വെള്ള, വയലറ്റ് , തുടങ്ങി വെള്ളയും ചുവപ്പും കലർന്ന പല നിറങ്ങളിൽ നരിവധി തരങ്ങളുണ്ട്. തനി വിദേശിയായ അഡീനിയം ചെടിക്ക് ഇന്ന് ആന്തൂറിയം പോലുള്ള ചെടികളെക്കാൾ ഡിമാൻഡ് ഉണ്ട്. ഇപ്പോ മിക്ക വീടുകളുടെയും ഉദ്യാനത്തിൽ താരമാണ് അഡീനിയം.
കുമിളുകളുടെ ആക്രമണമാണ് പ്രധാനമായും അഡീനിയത്തെ നശിപ്പിക്കുന്നത് . ഇതിനു ചില കുമിള് നാശിനികളും സ്വന്തമായ ചില കൂട്ടുകളുമാണ് സോണി ഉപയോഗിക്കുന്നത്. കുമിളുകളെ തുരത്തുന്ന രീതികള് അഡീനിയം വച്ച് പിടിപ്പിച്ചിട്ടുള്ളവരുമായി പങ്ക് വെക്കാനും ഇവക്കുള്ള കീടനാശിനി സൗജന്യമായി നൽകാനും സോണി തയ്യാറാണ്. ഫോണ്- 9497035659
