അബുദാബി: എമിറേറ്റിലെ മുഴുവന്‍ മേഖലകളിലെയും പ്രവര്‍ത്തനങ്ങള്‍ രണ്ടാഴ്ചയ്ക്കുള്ളില്‍ പുനരാരംഭിക്കുമെന്ന് അബുദാബി എമര്‍ജന്‍സി ക്രിസിസ് ആന്‍ഡ് ഡിസാസ്റ്റേഴ്സ് കമ്മിറ്റി പ്രഖ്യാപിച്ചു.എമിറേറ്റില്‍ നടപ്പിലാക്കിയിട്ടുള്ള കോവിഡ്‌ പ്രതിരോധ പ്രവര്‍ത്തനങ്ങളുടെയും, മുന്‍കരുതല്‍ നടപടികളുടെയും ഫലമായി വൈറസ് വ്യാപനത്തെ വിജയകരമായി തടയാന്‍ സാധിച്ചതും, നിലവില്‍ എമിറേറ്റില്‍ രേഖപ്പെടുത്തുന്ന രോഗബാധയിലെ കുറവും കണക്കിലെടുത്താണ് കമ്മിറ്റി തീരുമാനം .
ഇതിന്റെ ഭാഗമായി അബുദാബിയിലെ മുഴുവന്‍ വാണിജ്യ, സാംസ്‌കാരിക, വിനോദ, വിനോദസഞ്ചാര പ്രവര്‍ത്തനങ്ങളും പൂര്‍ണ്ണ രൂപത്തില്‍ പുനരാരംഭിക്കുമെന്നും, നിലവില്‍ ഏര്‍പ്പെടുത്തിയിട്ടുള്ള പ്രതിരോധ മുന്‍കരുതല്‍ നടപടികള്‍ കൂടുതല്‍ ഫലപ്രദമാകുന്ന രീതിയിലേക്ക് മാറ്റുമെന്നും അറിയിപ്പില്‍ പറയുന്നു.
വൈറസ് വ്യാപനം തടയുന്നതിനാവശ്യമായ എല്ലാ ജാഗ്രതയും, പ്രവര്‍ത്തനങ്ങളും അധികൃതര്‍ തുടരും.പരിശോധനകളും, രോഗബാധിതരുമായി സമ്പര്‍ക്കം പുലര്‍ത്തിയിരുന്നവരെ കണ്ടെത്തുന്ന പ്രവര്‍ത്തനങ്ങളും തുടരുമെന്നും കമ്മിറ്റി വ്യക്തമാക്കി.
