മനാമ / കുവൈത്ത് സിറ്റി: ഇറാന്റെ ആണവ കേന്ദ്രങ്ങൾക്കു നേരെയുള്ള യുഎസ് വ്യോമാക്രമണത്തെ തുടർന്ന് ഗൾഫ് രാജ്യങ്ങളിൽ ആശങ്ക വർദ്ധിച്ചു. പ്രത്യേകിച്ച് ഇറാനിലെ ബുഷെർ ആണവ റിയാക്ടറിന്റെ ഗൾഫ് മേഖലയോട് അടുത്തുള്ള സ്ഥാനം ദൗത്യപ്രദമായി വിലയിരുത്തുകയാണ്. പശ്ചാത്തലത്തിൽ ബഹ്റൈനും കുവൈത്തും അടിയന്തര നടപടികൾ പ്രഖ്യാപിച്ചു.
ബഹ്റൈനിൽ സ്കൂളുകളും കോളജുകളും താത്കാലികമായി ഓൺലൈൻ രീതിയിലേക്ക് മാറ്റി. മധ്യവേനൽ അവധി തുടങ്ങുന്നതിനാൽ 8-ആം ക്ലാസ് വരെയുള്ള വിദ്യാർത്ഥികൾക്ക് അവധി പ്രഖ്യാപിച്ചു. 9 മുതൽ 12 വരെ ക്ലാസുകൾ ഓൺലൈൻ മോഡിൽ തുടരും – ജൂൺ 26 വരെ. വിദ്യാഭ്യാസ മന്ത്രാലയത്തിന്റെ നിർദേശപ്രകാരം ഉടൻ വിദ്യാർത്ഥികളെ സ്കൂൾ ബസുകളിൽ വീടുകളിലേക്ക് തിരിച്ചയച്ചു. രക്ഷിതാക്കൾക്കും വിവരം അറിയിക്കപ്പെട്ടു.
അതിനോടൊപ്പം, 70% സർക്കാർ ജീവനക്കാർക്ക് വീട്ടിൽനിന്ന് ജോലി ചെയ്യാൻ നിർദേശം നൽകിയിട്ടുണ്ട്. പ്രധാന നഗരമാർഗങ്ങളിലൂടെയുള്ള യാത്രകൾ പരമാവധി ഒഴിവാക്കണമെന്ന് അധികൃതർ അഭ്യർഥിച്ചു. അടിയന്തര സാഹചര്യങ്ങൾ നേരിടാനായി ദേശീയ നടപടിയൊരുക്കം ആരംഭിച്ചിട്ടുണ്ട്:
- 33 അടിയന്തര അഭയകേന്ദ്രങ്ങൾ ഒരുക്കിയിട്ടുണ്ട്
- 9,000 പ്രതിരോധ ഉദ്യോഗസ്ഥരെ വിന്യസിച്ചിരിക്കുകയാണ് – സൈനികരും സിവിലിയൻ ഉദ്യോഗസ്ഥരുമായി
ഗൾഫ് രാജ്യങ്ങളിൽ വർദ്ധിച്ച ആശങ്ക
ഇറാനുമായുള്ള തർക്കത്തിൽ യുഎസ് നേരിട്ട് ഇടപെട്ടാൽ ഗൾഫ് മേഖലയിലെ യുഎസ് സൈനിക താവളങ്ങൾ ലക്ഷ്യമാകുമെന്ന് ഇറാൻ മുന്നറിയിപ്പ് നൽകിയതും, ഈ ആശങ്കയ്ക്ക് അടിസ്ഥാനമാകുന്നു. കുവൈത്തും ഇതിനായി മുന്കരുതൽ നടപടികൾ സ്വീകരിച്ചു. നിരവധി ഷെൽട്ടറുകൾ ഇതിനകം ഒരുക്കിയതും അതിന്റെ ഭാഗമാണ്.
എന്നിരുന്നാലും, നിലവിൽ ബുഷെർ ആണവ റിയാക്ടറുമായി ബന്ധപ്പെട്ട് റേഡിയേഷൻ ഭീഷണിയൊന്നുമില്ലന്ന് സൗദി അറേബ്യ, യുഎഇ, ഖത്തർ, കുവൈത്ത് എന്നീ രാജ്യങ്ങൾ അറിയിച്ചു.
