ഷാർജ : ട്രാഫിക്, ക്രിമിനൽ, സാമൂഹിക സേവന മേഖലകളിൽ മികച്ച പ്രകടനം കാഴ്ചവെച്ച് ഷാർജ പൊലീസ് 2024ലെ ജനപിന്തുണ റിപ്പോർട്ടിൽ തിളങ്ങി. ഉപയോക്തൃ സംതൃപ്തി നിരക്ക് 97.8% ആയി ഉയർന്നതായാണ് ഔദ്യോഗിക വിവരം. സേവനങ്ങളിലെ നൂതനതയും പൊതുജനങ്ങളുടെ ആവശ്യങ്ങൾക്കനുസരിച്ചുള്ള ദ്രുതപ്രതികരണവുമാണ് ഈ നേട്ടത്തിന് പിന്നിലെന്നും അധികൃതർ അറിയിച്ചു.
ഡിജിറ്റൽ സേവനങ്ങളിലേക്ക് വലിയ ചുവടുവയ്പ്
2023നെ അപേക്ഷിച്ച് 2024ൽ ഡിജിറ്റൽ സേവനങ്ങൾ ഉപയോഗിക്കുന്നവരുടെ നിരക്ക് 12.69% ഉയർന്ന് 84.37% ആയി. എല്ലാ സേവനങ്ങളും ഡിജിറ്റൽ പ്ലാറ്റ്‌ഫോമിലേക്കു മാറ്റാനും 24 മണിക്കൂറും ലഭ്യമാകുന്ന സ്മാർട്ട് സുരക്ഷാ സംവിധാനങ്ങൾ നടപ്പിലാക്കാനുമുള്ള ശ്രമങ്ങൾ വലിയ സ്വീകാര്യതയാണ് നേടുന്നത്.
സൗകര്യപ്രദവും വേഗതയാർന്നതുമായ സേവനം
സേവനങ്ങൾ നേരിട്ടെത്താതെ തന്നെ ഉപയോക്താക്കൾക്ക് എളുപ്പത്തിൽ ലഭ്യമാകുന്ന സംവിധാനങ്ങൾ മികച്ച പ്രതികരണമാണ് നേടിയതെന്ന് സ്ട്രാറ്റജി ആൻഡ് ഇൻസ്റ്റിറ്റ്യൂഷനൽ എക്സലൻസ് വിഭാഗം ഡയറക്ടർ കേണൽ ഡോ. സമിഹ് ഖമീസ് അൽ ഹിലിയാൻ പറഞ്ഞു. ഉപയോക്തൃ സേവന കേന്ദ്രങ്ങളിലെ കാര്യക്ഷമതയും അദ്ദേഹം എടുത്തു പറഞ്ഞു – സേവന വിതരണത്തിന് ശരാശരി വേണ്ടി വന്നത് 59 സെക്കൻഡും, കാത്തിരിപ്പ് സമയം 33 സെക്കൻഡിൽ താഴെയുമാണ്.
2024ലെ ആദ്യപാതിയിൽ മാത്രം 13,39,906 ഇടപാടുകൾ പൂർത്തിയാക്കിയതായി റിപ്പോർട്ടിൽ പറയുന്നു. സേവനരീതിയിലെ ലളിതത്വം, ജീവനക്കാരുടെ ക്ഷമയോടെയും കാര്യക്ഷമതയോടെയും ഉള്ള പ്രതികരണം എന്നിവയാണ് ഈ നേട്ടങ്ങൾക്ക് പിന്നിലെ പ്രധാനഘടകങ്ങൾ.
