നമ്മുടെ ജീവിതത്തില്‍ അത്യാവശ്യ വസ്തുക്കളിലൊന്നായി മാറിയിരിക്കുകയാണ് മാസ്ക്കുകള്. കോവിഡ് പ്രതിരോധത്തിനായി മാസ്ക് മുഖ്യമായ ഈ കാലത്ത് ആഡംബര മാസ്ക്കുകളുമായി എത്തിയിരിക്കുകയാണ് ചിലര്‍. വെള്ളികൊണ്ടും സ്വര്‍ണ്ണ കൊണ്ടുമുളള മാസ്ക്കുകള് നാം ഇതിനോടകം തന്നം കണ്ടു കഴിഞ്ഞു. എന്നാല്‍ അവയില്‍ നിന്നെല്ലാം വ്യത്യസ്തമായ ആഡംബര മാസ്ക്കുകളുമായി എത്തിയിരിക്കുകയാണ് സൂറത്തിലെ വജ്ര വ്യാപാരി. കോവിഡിനെ തുടര്‍ന്ന സാമ്പത്തിക പ്രതിസന്ധി നേരിടുന്ന ഈ കാലത്താണ് സൂറത്തിലെ വ്യാപാരിയുടെ വജ്രങ്ങള്‍ പതിപ്പിച്ച മാസ്ക്കുകളുടെ പുതിയ സംരംഭം.
സ്വര്‍ണ്ണക്കട ഉടമയായ ദീപക് ചോക്‌സിയാണ് ഈ പുതിയ ആശയത്തിനു പിന്നില്‍. ഒന്നര ലക്ഷം മുതല്‍ നാലു ലക്ഷം രൂപ വരെയാണ് വജ്രം പിടിപ്പിച്ച മാസ്ക്കുകളുടെ വില. സ്വര്‍ണ്ണത്തിനൊപ്പം ഒറിജിനല്‍ വജ്രവും അമേരിക്കന്‍ ഡയമണ്ടുമാണ് മാസ്‌ക്ക് നിര്‍മ്മാണത്തിനായി ഉപയോഗിക്കുന്നത്. സ്വര്‍ണ്ണത്തോടൊപ്പം അമേരിക്കന്‍ ഡയമണ്ട് ചേര്‍ത്തുളള മാസ്‌ക്കിന് ഒന്നരലക്ഷം രൂപയാണ് വില. വൈറ്റ് ഗോള്‍ഡും ഒറിജിനല്‍ ഡയമണ്ടും പിടിപ്പിച്ച മാസ്‌ക്കിന്റെ വില നാല് ലക്ഷം രൂപയാണ്.
ലോക്ക്ഡൗണിനു ശേഷം നടന്ന ഒരു വിവാഹത്തിനായി പ്രത്യേകതയുളള മാസ്ക്കുകള് ആവശ്യപ്പെട്ട് ഒരാള്‍ എത്തിയതിനെ തുടര്‍ന്നാണ് വ്യത്യസ്ത മാസ്ക്കുകള് നിര്‍മ്മിക്കണമെന്ന് ആശയം ഉദിച്ചത്. ഇതോടെയാണ് താന്‍ വജ്രം പിടിപ്പിച്ച മാസ്ക്കുകള് ഡിസൈന്‍ ചെയ്ത് പുറത്തിറക്കാന്‍ തീരുമാനിച്ചെതെന്ന് ചോക്‌സി പറഞ്ഞു. സര്‍ക്കാര്‍ മാര്‍ഗ്ഗ നിര്‍ദേശത്തിന് അനുസൃതമായിട്ടുളള തുണിയാണ് മാസ്‌ക്ക് നിര്‍മ്മാണത്തിനായി ഉപയോഗിക്കുന്നത്. കൂടാതെ മാസ്‌ക്കുകളില്‍ പിടിപ്പിച്ച സ്വര്‍ണ്ണവും വജ്രവും ഉപഭോക്താക്കള്‍ക്ക് പുറത്തെടുത്ത് മറ്റു ആഭരണങ്ങള്‍ നിര്‍മ്മിക്കാന്‍ ഉപോയിക്കാമെന്നും അദ്ദേഹം പറഞ്ഞു.
