വാഹനം ഓടിക്കുന്നതിനിടെ മൊബൈല്‍ ഉപയോഗിക്കുന്നതിനാല്‍ അപകടങ്ങള്‍ വര്‍ദ്ധിക്കുന്ന സാഹചര്യത്തിലാണ് കര്‍ശന നടപടികള്‍
അബുദാബി : വാഹനം ഓടിക്കുന്നതിനിടെ മൊബൈല്‍ ഉപയോഗിക്കുന്ന പ്രവണത മൂലം അപകടങ്ങള്‍ വര്‍ദ്ധിക്കുന്നതായി അബുദാബി പോലീസ്. ഇത് തടയാന്‍ കര്‍ശന നടപടികള്‍ സ്വീകരിക്കുമെന്ന് അബുദാബി പോലീസ് അറിയിച്ചു
നിയമലംഘനം കണ്ടെത്താന്‍ നിരീക്ഷണ ക്യാമറകളുടെ സഹായം കൂടുതലായി ഉപയോഗിക്കും. നിലവില്‍ ക്യാമറകളിലൂടെ ഇത്തരം ദുരുപയോഗം കണ്ടെത്തുന്നുണ്ടെങ്കിലും കര്‍ശന നടപടികളിലേക്ക് പോലീസ് നീങ്ങിയിട്ടില്ല.
എന്നാല്‍,അപകടങ്ങള്‍ വര്‍ദ്ധിക്കുന്ന സാഹചര്യത്തില്‍ ബോധവല്‍ക്കരണവും നിരീക്ഷണവും വ്യാപകമാക്കി. നിയമലംഘകര്‍ക്ക് 800 ദിര്‍ഹം പിഴയും നാലു ബ്ലാക് പോയിന്റും ലഭിക്കും.
വാഹനങ്ങള്‍ തമ്മില്‍ സുരക്ഷിതമായ അകലം പാലിക്കാത്തതും പെട്ടെന്ന് ലെയിന്‍ മാറുക, മുന്നറിയിപ്പില്ലാതെ തിരിക്കുക, പൊടുന്നനെ ബ്രേക്ക് ഇടുക എന്നിവയാണ് അപകടങ്ങളുടെ മുഖ്യകാരണമെന്ന് അബുദാബി പോലീസ് പറയുന്നു.
റോഡ് സുരക്ഷ ഉറപ്പു വരുത്താന്‍ വാഹനം ഓടിക്കുന്നവര്‍ സാമൂഹിക ഉത്തരവാദിത്തതോടെ പെരുമാറണമെന്നും ഗതാഗത നിയമങ്ങള്‍ പാലിച്ച് സ്വയം സുരക്ഷയും മറ്റുള്ളവരുടെ ജീവന് ഭീഷണി ഇല്ലാതെയും ഡ്രൈവിംഗ് നടത്തണമെന്ന് പോലീസ് അറിയിച്ചു.
