തലശേരിയില്‍ മറ്റു മണ്ഡലങ്ങളില്‍ സമര്‍പ്പിച്ചതു പോലുളള അധികാര പത്രം സമര്‍പ്പിച്ചില്ല. അതിനുപകരം കളര്‍ ഫോട്ടോസ്റ്റാറ്റ് കോപ്പിയാണ് സമര്‍പ്പിച്ചത്. അതുകൊണ്ടാണ് നാമനിര്‍ദേശ പത്രിക തളളിയത്. അതൊടൊപ്പം എല്ലാ രാഷ്ട്രീയ പാര്‍ട്ടികളും ചെയ്യുന്നതുപോലെ ബിജെപിയുടെ ഡമ്മി സ്ഥാനാര്‍ഥിയുടെ പത്രികയും തളളി. ഇത് എങ്ങനെ സംഭവിച്ചു എന്ന് ബിജെപി വ്യക്തമാക്കണം
കണ്ണൂര്‍ : തലശേരിയില്‍ ബിജെപി സ്ഥാനാര്‍ഥിയുടെ നാമനിര്‍ദേശ പത്രിക തള്ളിയതോടെ ബിജെപിയും കോണ്‍ഗ്രസും തമ്മിലുളള അന്തര്‍ധാര യാണ് മറനീക്കി പുറത്തുവരുന്നതെന്ന് സിപിഎം കണ്ണൂര്‍ ജില്ലാ സെക്രട്ടറി എം.വി ജയരാജന്‍. അശ്രദ്ധമൂലമുണ്ടായ പിഴവാണു നാമനിര്‍ദേശ പട്ടിക തളളാന്‍ ഇടയാക്കിയതെന്ന് കരുതാനാകില്ലെന്നും അദ്ദേഹം പറഞ്ഞു.
തലശേരിയില്‍ മറ്റു മണ്ഡലങ്ങളില്‍ സമര്‍പ്പിച്ചതു പോലുളള അധികാര പത്രം സമര്‍പ്പിച്ചില്ല. അതിനുപകരം കളര്‍ ഫോട്ടോസ്റ്റാറ്റ് കോപ്പിയാണ് സമര്‍പ്പിച്ചത്. അതുകൊണ്ടാണ് നാമനിര്‍ദേശ പത്രിക തളളിയത്. അതൊടൊപ്പം എല്ലാ രാഷ്ട്രീയ പാര്‍ട്ടികളും ചെയ്യുന്നതുപോലെ ബിജെപിയുടെ ഡമ്മി സ്ഥാനാര്‍ഥിയുടെ പത്രികയും തളളി. ഇത് എങ്ങനെ സംഭവിച്ചു എന്ന് ബിജെപി വ്യക്തമാക്കണം.
കണ്ണൂര്‍ ജില്ലയിലെ മറ്റുമണ്ഡലങ്ങളിലെ ബിജെപി സ്ഥാനാര്‍ഥികള്‍ക്ക് വേണ്ടി ഫോം എയും ബിയും ദേശീയ-സംസ്ഥാന അധ്യക്ഷന്മാര്‍ ശരിയായ വിധത്തില്‍ നാമനിര്‍ദേശ പത്രികയോടൊപ്പം ആധികാരിക പത്രം സമര്‍പ്പിച്ചപ്പോള്‍ എന്തുകൊണ്ട് ജില്ലാ പ്രസിഡന്റുകൂടിയായ ഹരിദാസിന്റെ നോമിനേഷനോടൊപ്പം ചട്ടപ്രകാരമുളള അധികാര പത്രം സമര്‍പ്പിച്ചില്ല. മറ്റുമണ്ഡലങ്ങളില്‍ ശരിയായ വിധത്തില്‍ സമര്‍പ്പിക്കാമെങ്കില്‍ തലശ്ശേരിയിലും സമര്‍പ്പിക്കാമല്ലോ- ജയരാജന്‍ ചോദിക്കുന്നു.
ഇത് സംബന്ധിച്ച് ബിജെപി നിയമപരമായ നടപടികള്‍ സ്വീകരിക്കുമെന്ന് വ്യക്തമാക്കിയിട്ടുണ്ട്. അതിനുളള അവകാശം ബിജപിക്കും സ്ഥാനാര്‍ഥിക്കും ഉണ്ട്. എന്നാല്‍ തങ്ങളുടെ നോമിനേഷന്‍ തളളാന്‍ ഇടവരുത്തുന്ന വിധത്തില്‍ ഒരു നോമിനേഷന്‍ സമര്‍പ്പിക്കുക എന്നുളളത് അശ്രദ്ധ മൂലം സംഭവിച്ചതാണെന്ന് വിശ്വസിക്കാന്‍ ആര്‍ക്കും കഴിയില്ലെന്ന് ജയരാജന്‍ ചൂണ്ടിക്കാട്ടി.
