തിരുവനന്തപുരം: കരമന കൂടത്തില് കുടുംബത്തിലെ ദുരൂഹമരണങ്ങളില് അവസാനത്തേത് കൊലപാതകമാണെന്ന് പൊലീസ്. കൂടത്തില് വീട്ടിലെ ഗൃഹനാഥന് ജയമാധവന് നായരെ (63) കാര്യസ്ഥന് രവീന്ദ്രന് നായര് കൊലപ്പെടുത്തിയെന്നാണ് പൊലീസ് നിഗമനം. ഇയാള്ക്കെതിരെ കൊലക്കുറ്റം ചുമത്താന് പൊലീസ് റിപ്പോര്ട്ട് നല്കി.
ഫോറന്സിക് പരിശോധനയിലൂടെയാണ് കൊലപാതകം സ്ഥിരീകരിച്ചത്. സ്വത്ത് തട്ടിയെടുക്കാനാണ് കൊന്നതെന്ന് സംശയിക്കുന്നു. 2017 ഏപ്രിലിലാണ് ജയമാധവന്നായര് കൊല്ലപ്പെട്ടത്.
നഗരത്തില് കോടിക്കണക്കിനു രൂപയുടെ വസ്തുവകകളും കെട്ടിടങ്ങളും കൂടത്തില് കുടുംബത്തിനുണ്ട്. ഇതെല്ലാം കാര്യസ്ഥന് രവീന്ദ്രന് നായരാണ് വര്ഷങ്ങളായി നോക്കി നടത്തുന്നത്. ജയമാധവന് നായരുടെ സഹോദരനായ ജയപ്രകാശ് രക്തം ഛര്ദ്ദിച്ചാണ് മരിച്ചത്. അസ്വാഭിക മരണമാണെന്ന് ബന്ധുക്കളില് ചിലരും നാട്ടുകാരില് പലരും അന്ന് സംശയം പ്രകടിപ്പിച്ചിരുന്നെങ്കിലും പോസ്റ്റുമോര്ട്ടം നടത്തിയിരുന്നില്ല.
കൂടത്തില് വീട്ടിലെ പിതാവ് ഗോപിനാഥന് നായര്, ഗോപിനാഥന് നായരുടെ ഭാര്യ സുമുഖിയമ്മ, മക്കളായ ജയബാലകൃഷ്ണന്, ജയശ്രീ, ജയപ്രകാശ്, ഗോപിനാഥന് നായരുടെ മൂത്ത സഹോദരങ്ങളായ നാരായണ പിള്ള, വേലുപിള്ള എന്നിവരുടെ മക്കളായ ജയമാധവന് നായര്, ഉണ്ണികൃഷ്ണന് നായര് എന്നിവരുടെ മരണത്തിലാണ് വേലുപ്പിള്ളയുടെ മകന്റെ ഭാര്യ പ്രസന്ന ദുരൂഹത ആരോപിച്ച് പരാതി നല്കിയത്.
