തിരുവനന്തപുരം: സമരം ചെയ്യുന്ന ഉദ്യോഗാര്‍ത്ഥികള്‍ക്ക് അനുഭാവം പ്രകടിപ്പിച്ച് കെ എസ് യു നടത്തിയ സെക്രട്ടറിയേറ്റ് മാര്‍ച്ചില്‍ വന്‍ സംഘര്‍ഷം. പെണ്‍കുട്ടികള്‍ ഉള്‍പ്പടെയുളളവരെ പൊലീസ് വളഞ്ഞിട്ട് തല്ലുകയായിരുന്നു. കെ എസ് യു സംസ്ഥാന വൈസ് പ്രസിഡന്റ് സ്‌നേഹയുടെ തലയ്ക്ക് പൊലീസിന്റെ ലാത്തിയടിയില്‍ ഗുരുതരമായി പരിക്കേറ്റു. സെക്രട്ടറിയേറ്റിനുളളിലേക്ക് ചാടിക്കടക്കാന്‍ കെ എസ് യു പ്രവര്‍ത്തകരുടെ ശ്രമം പൊലീസ് തടഞ്ഞതിനെത്തുടര്‍ന്ന് പൊലീസിനുനേരെ പ്രവര്‍ത്തകര്‍ കസേരയും വടികളും വലിച്ചെറിഞ്ഞു. തുടര്‍ന്ന് വനിതാ പൊലീസും പ്രവര്‍ത്തകരും തമ്മില്‍ ഉന്തും തളളുമുണ്ടായി.
ആദ്യം കന്റോണ്‍മെന്റ് ഗേറ്റിനുമുന്നില്‍ പ്രവര്‍ത്തകരെ നേരിട്ട പൊലീസ് തുടര്‍ന്ന് സെക്രട്ടറിയേറ്റിനുമുന്നിലുളളവരെയും വളഞ്ഞിട്ട് തല്ലുകയായിരുന്നു. കെഎസ്യു സംസ്ഥാന നേതാക്കളെല്ലാം സെക്രട്ടറിയേറ്റിനു മുന്നിലെ സമര രംഗത്തുണ്ട്. കെഎസ്യു അദ്ധ്യക്ഷന്‍ കെ.എം അഭിജിത്തിനും ലാത്തിചാര്‍ജില്‍ പരുക്കേറ്റു.സംഘര്‍ഷം വര്‍ദ്ധിച്ചതോടെ യൂത്ത് കോണ്‍ഗ്രസ് പ്രവര്‍ത്തകരും സ്ഥലത്തെത്തിയതോടെ സെക്രട്ടറിയേറ്റിനു മുന്നില്‍ യുദ്ധസമാന സാഹചര്യമുണ്ടായി. മാധവരായര്‍ പ്രതിമയ്ക്ക് മുന്നില്‍ ഉദ്യോഗാര്‍ത്ഥികളുടെ സമരത്തിനടുത്താണ് സംഘര്‍ഷമുണ്ടായത്. പത്തിലധികം പ്രവര്‍ത്തകര്‍ക്ക് പൊലീസ് നടപടിയില്‍ പരുക്കേറ്റിട്ടുണ്ട്.
