ജിദ്ദ: രാജ്യത്ത് കൂടുതല്‍ കോറോണ വാക്സിനുകളെത്തിയതായും വിതരണം ആരംഭിച്ചതായും ആരോഗ്യ മന്ത്രാലയം അറിയിച്ചു. കോവിഡ് പ്രോട്ടോകോള്‍ ലംഘനത്തിന് ഒരാഴ്ചക്കിടെ അര ലക്ഷത്തോളം പേര്‍ക്കെതിരെ നടപടി സ്വീകരിച്ചിട്ടുണ്ട്. കൊറോണ വാക്സിന് നിര്‍മ്മാണ കമ്പനിയില്‍ നിന്ന് വിതരണത്തില്‍ കാലതാമസം നേരിട്ടതിനാല്‍ മന്ദഗതിയിലായിരുന്ന വാക്സിനേഷന്‍ പദ്ധതി വീണ്ടും സജീവമായി തുടങ്ങി.
കഴിഞ്ഞ ദിവസം മാത്രം രണ്ടായിരത്തി അഞ്ഞൂറോളം ഡോസ് വാക്സിന് വിതരണം ചെയ്തിട്ടുണ്ട്. ഇതോടെ ഇത് വരെ 4,46,940 ഡോസ് വാക്സിന് വിതരണം ചെയ്തതായി ആരോഗ്യ മന്ത്രാലയം അറിയിച്ചു. രണ്ടാമത്തെ ഡോസിനായി കാത്തിരിക്കുന്നവര്‍ വേഗത്തില്‍ അപ്പോയിന്റ്‌മെന്റെടുക്കണമന്നെും അധികൃതര്‍ ഓര്‍മ്മിപ്പിച്ചു.
കോവിഡ് പ്രോട്ടോകോള്‍ ലംഘനത്തിന് ഒരാഴ്ചക്കിടെ 47,334 കേസുകളാണ് രജിസ്റ്റര്‍ ചെയ്തത്. റിയാദില്‍ കഴിഞ്ഞ 48 മണിക്കൂറിനിടെ പുതിയ നിയമ ലംഘനങ്ങളില്‍ 50 ശതമാനത്തിന്റെ കുറവുണ്ടായിട്ടുണ്ട്. കൃത്യമായി കോവിഡ് പ്രോട്ടോകോള്‍ പാലിച്ചുകൊണ്ട് മുന്നോട്ട് പോകാന്‍ സമുഹം തയ്യാറായാല്‍ കര്‍ഫ്യൂ ഏര്‍പ്പെടുത്തേണ്ടി വരില്ലെന്ന് ആഭ്യന്തര മന്ത്രാലയം വ്യക്തമാക്കി. കോവിഡുമായി ബന്ധപ്പെട്ട് സോഷ്യല്‍മീഡിയ വഴിയും അല്ലാതെയും തെറ്റായ വാര്‍ത്തകള്‍ പ്രചരിപ്പിച്ച നിരവധി പേരെ അറസ്റ്റ് ചെയ്തിട്ടുണ്ട്.
