കൊച്ചി: കാലടി സര്വകലാശാലയിലെ മലയാള വിഭാഗത്തില് അസിസ്റ്റന്റ് പ്രൊഫസറായി നിയമിതയായ എം.ബി രാജേഷിന്റെ ഭാര്യ നിനിത കണിച്ചേരിയുടെ നിയമനത്തില് ക്രമക്കേടുണ്ടെന്ന് സൂചിപ്പിച്ച് കാലിക്കറ്റ് സര്വകലാശാലയിലെ പ്രൊഫസര് ഡോ. ഉമര് തറമേല്. നിനിത നിയമിക്കപ്പെട്ട തസ്തികയിലേക്കുള്ള അഭിമുഖത്തില് ഭാഷാ വിദഗ്ധനെന്ന നിലയില് വിദഗ്ധ സമിതി അംഗമായി പങ്കെടുത്തയാളായിരുന്നു ഡോ.ഉമര് തറമേല്.
കോഴിക്കോട് സര്വ്വകലാശാലയിലെ മലയാള-കേരളപഠന വകുപ്പില് പ്രൊഫസറാണ് അദ്ദേഹം. റാങ്ക് ലിസ്റ്റ് തന്നെ ശീര്ഷാസനം ചെയ്ത് പോയ അനുഭവം ഇതാദ്യമായിട്ടാണെന്നും ഇനി മേലാല് സബ്ജക്ട് എക്സ്പര്ട്ടായി നിയമന പ്രക്രിയകളില് പങ്കെടുക്കാനില്ലെന്നും ഡോ.ഉമര് തറമേല് ഫേസ്ബുക്ക് പോസ്റ്റില് പറയുന്നു.
https://www.facebook.com/umertharamel.tharamel/posts/3649610605119725
ഉമര് തറമേല് അടക്കം തയ്യാറാക്കി നല്കിയ ലിസ്റ്റില് നിര്ദേശിച്ച ഉദ്യോഗാര്ത്ഥി നിനിത കണിച്ചേരിയല്ല എന്നാണ് അദ്ദേഹം സൂചിപ്പിക്കുന്നത്. ഇതുമായി ബന്ധപ്പെട്ട് കൂടുതല് പ്രതികരണങ്ങള്ക്ക് അദ്ദേഹം തയ്യാറല്ല. വിദഗ്ധ സമിതിയുടെ എതിര്പ്പടക്കം ചൂണ്ടിക്കാട്ടി സേവ് യൂണിവേഴ്സിറ്റി ഫോറം ഗവര്ണര്ക്ക് പരാതിയും നല്കിയിട്ടുണ്ട്. പി.എസ്.സി നടത്തിയ എഴുത്തു പരീക്ഷയില് 212-ാം റാങ്ക് മാത്രമാണ് നിനിത കണിച്ചേരിക്കുള്ളത്. നിനിതയേക്കാള് യോഗ്യതയുള്ളവരുണ്ടായിട്ടും അവരെയെല്ലാം തഴഞ്ഞ് നിനിതയ്ക്ക് നിയമനം നല്കിയെന്നതാണ് ആരോപണം.
പോസ്റ്റിന്റെ പൂര്ണരൂപം
‘സബ്ജെക്ട് എക്സ്പെര്ട്ട്’ പണി നിര്ത്തി.
ഈ പണിയുടെ, മലയാള പരിഭാഷ വിഷയവിദഗ്ധന്, എന്നാണ്.കോളേജുകളിലോ സര്വകലാശാലകളിലോ അധ്യാപക നിയമനവ്യമായി ബന്ധപ്പെട്ടു, തത് വിഷയത്തില് പ്രവീണ്യമുള്ളവരെ ഉള്പ്പെടുത്തി അഭിമുഖം നടത്തണമെന്നും, ഉദ്യോഗാര്ഥികളുടെ മികവ് നോക്കി വിദഗ്ധര് നല്കുന്ന മാര്ക്കിന്റെ അടിസ്ഥാനത്തില് വേണം നിയമനം നടത്തണമെന്നുമാണ്, സര്വകലാ /യു ജി സി ചട്ടങ്ങള്. സാങ്കേതികമായി എല്ലാ അഭിമുഖങ്ങളും ഇങ്ങനെത്തന്നെയാണ് അരങ്ങേറുക.അതേ സാധുവാകൂ.
അധ്യാപന ജീവിതത്തില് ഏറെ കലാലയങ്ങളില് ഇങ്ങനെ പോകേണ്ടി വന്നിട്ടുണ്ട്. പലയിടത്തും സമരം ചെയേണ്ടി വന്നിട്ടുണ്ട്. എന്നാല് സ്വപ്നത്തില്പോലും നിനയ്ക്കാത്ത മട്ടില്,റാങ്ക് ലിസ്റ്റ് തന്നെ ശീര്ഷാസനം ചെയ്തുപോയ ഒരനുഭവം, കേരളത്തിലെ ഒരു സര്വകലാശാലയില്നിന്നും ഇതാ ദ്യമാണുണ്ടായത്.ഇതിനോടുള്ള കടുത്ത വിമര്ശനവും വിയോജിപ്പും ഞാനും സഹവിദഗ്ധരും സര്വകലാശാല അ ധികൃതരെ അറിയിച്ചിട്ടുണ്ട്. ഇതിന്റെ വെളിച്ചത്തില് ഇനിയും ഇപ്പണിക്ക് ഈയുള്ളവന് ഇല്ലെന്നു കേരളത്തിലെ അക്കാഡമിക് സമൂഹത്തെ ഇതിനാല് അറിയിച്ചുകൊള്ളുന്നു.
എന്ന് വിനീതവിധേയന്.
