കൊല്ലം: കല്ലമ്പലത്ത് കഴുത്തറുത്ത് മരിച്ച നിലയില് കണ്ടെത്തിയ ആതിരയുടെ ഭര്തൃമാതാവിനെ തൂങ്ങി മരിച്ച നിലയില് കണ്ടെത്തി. തിരുവനന്തപുരം കല്ലമ്പലം സുനിതാ ഭവനില് ശ്യാമളയാണ് മരിച്ചത്. വീടിന് തൊട്ടടുത്തുള്ള കോഴിഫാമിലാണ് ഇവരെ തൂങ്ങി മരിച്ച നിലയില് കണ്ടത്. ഇന്ന് രാവിലെയാണ് ഇവരെ മരിച്ച നിലയില് കണ്ടത്.
ജനുവരി 15-നാണ് ഇവരുടെ മരുമകളായിരുന്ന ആതിരയെ കഴുത്തറുത്ത് മരിച്ച നിലയില് കണ്ടെത്തിയത്. അന്ന് ആതിരയുടെ വിവാഹം കഴിഞ്ഞ് ഒന്നരമാസമേ ആയിരുന്നുള്ളൂ. ആതിരയുടേത് ആത്മഹത്യയാണെന്നായിരുന്നു പ്രാഥമിക പോസ്റ്റ്മോര്ട്ടം റിപ്പോര്ട്ട്. ഇതുമായി ബന്ധപ്പെട്ട അന്വേഷണം നടക്കുന്നതിനിടെയാണ് ഭര്തൃ മാതാവിന്റെ മരണം. ഇതോടെ സംഭവത്തിലെ ദുരൂഹത വര്ധിക്കുകയാണ്.
സമീപത്ത് കാണപ്പെട്ട കറിക്കത്തി ഉപയോഗിച്ച് തന്നെയാണ് ആതിര കഴുത്ത് അറുത്തിരിക്കുന്നത് എന്നാണ് നിഗമനം. ആത്മഹത്യയ്ക്ക് മുന്പായി ഉണ്ടാക്കിയതാകാം കൈകളിലെ മുറിവുകള്. ഇതാണ് പ്രാഥമിക അന്വേഷണത്തില് വിവരം. ആതിരയുടെ മരണം കൊലപാതകമാണെന്നതിന് വിദൂര സാധ്യത മാത്രമാണെന്നാണ് ഡോക്ടര്മാര് പറഞ്ഞിരിക്കുന്നത്.
