അബുദാബി: അബൂദബിയില്‍ ഇസ്രായേല്‍ എംബസി തുറന്നതിനു തൊട്ടുപിന്നാലെ തെല്‍ അവീവില്‍ യുഎഇ എംബസി സ്ഥാപിക്കാനുള്ള നടപടികളും ആരംഭിച്ചു. കഴിഞ്ഞ ദിവസം യുഎഇ മന്ത്രിസഭ ഇതു സംബന്ധിച്ച തീരുമാനം കൈക്കൊണ്ടു. ഇതിനു പുറമെ രണ്ടു രാജ്യങ്ങളിലും കോണ്‍സുലേറ്റുകള്‍ വൈകാതെ സ്ഥാപിക്കുമെന്നും റിപ്പോര്‍ട്ടുകളുണ്ട്.
കഴിഞ്ഞ വര്‍ഷമാണ് യുഎഇ-ഇസ്രായേല്‍ നയതന്ത്രബന്ധത്തിന് തുടക്കമായത്. ഇസ്രയേലില്‍ യുഎഇയുടെ ആദ്യ നയതന്ത്ര ദൗത്യത്തിന് മന്ത്രിസഭ അംഗീകാരം നല്‍കിയതോടെ തുടര്‍ നടപടികള്‍ സജീവമായി. കോവിഡ് പ്രതിസന്ധിയെ തുടര്‍ന്നാണ് എംബസി ആരംഭിക്കുന്നത് വൈകിയതെന്ന് യുഎഇ നേതൃത്വം അറിയിച്ചു.
അബുദബിയില്‍ ഇസ്രായേല്‍ എംബസി തുറന്നതായി ഇസ്രായേല്‍ പ്രതിനിധി ഈതാന്‍ നഹെ വെളിപ്പെടുത്തി. സ്ഥിരമായ സ്ഥലം കണ്ടെത്തുന്നതുവരെ താല്‍ക്കാലിക സ്ഥലത്താണ് ഇസ്രായേല്‍ സ്ഥാനപതി കാര്യാലയം പ്രവര്‍ത്തിക്കുക. ഇസ്രായേലിന്റെ യുഎഇയിലെ ആദ്യ അംബാസഡറായി ഇതാന്‍ നഈ ചുമതലയേറ്റു.
ദുബൈയില്‍ ഇസ്രായേല്‍ കോണ്‍സുലേറ്റ് ഉടന്‍ തുറക്കുമെന്നാണ് വിവരം. ഇരു രാജ്യങ്ങളിലെയും പൗരന്‍മാര്‍ക്ക് വിസാരഹിത യാത്ര ഏര്‍പ്പെടുത്തിയിരുന്നെങ്കിലും കോവിഡ് വ്യാപനത്തെ തുടര്‍ന്ന് തീരുമാനം ജൂലൈ വരെ മരവിപ്പിക്കാന്‍ യുഎഇ കഴിഞ്ഞ ദിവസം തീരുമാനിച്ചിരുന്നു.
