കുവൈത്ത് സിറ്റി: കുവൈത്തിലേക്ക് ഗാര്‍ഹികത്തൊഴിലാളികളെ റിക്രൂട്ട് ചെയ്യാന്‍ റിക്രൂട്ട്‌മെന്റ് ഓഫിസുകള്‍ 990 ദീനാര്‍ മാത്രമേ ഈടാക്കാവൂ എന്ന് വാണിജ്യ മന്ത്രാലയവും മാന്‍പവര്‍ അതോറിറ്റിയും വ്യക്തമാക്കി. കോവിഡ് പശ്ചാത്തലത്തില്‍ റിക്രൂട്ട്‌മെന്റ് ഓഫിസുകള്‍ അമിത ഫീസ് ഈടാക്കുന്നതായി സ്വദേശികളില്‍നിന്ന് നിരവധി പരാതി ഉയര്‍ന്നിരുന്നു. അമിത നിരക്ക് ഈടാക്കുന്നുണ്ടെങ്കില്‍ വാണിജ്യ മന്ത്രാലയത്തിന്റെ 135 എന്ന ഹോട്ട്‌ലൈന്‍ നമ്പറിലോ domestic.workers@manpowe.gov.kw എന്ന ഇ-മെയില്‍ വിലാസത്തിലോ അറിയിക്കണമെന്ന് അധികൃതര്‍ അറിയിച്ചു.
ക്വാറന്റീന്‍, പി.സി.ആര്‍ പരിശോധന, ഉയര്‍ന്ന വിമാന ടിക്കറ്റ് നിരക്ക്, വിദേശ രാജ്യങ്ങളില്‍ നല്‍കേണ്ട റിക്രൂട്ട്‌മെന്റ് ഫീസ് വര്‍ധന തുടങ്ങി ചെലവുകള്‍ വര്‍ധിച്ചതിനാല്‍ 990 ദീനാറിന് റിക്രൂട്ട്‌മെന്റ് സാധ്യമല്ലെന്നാണ് റിക്രൂട്ട്‌മെന്റ് ഓഫിസ് യൂണിയന്‍ നിലപാട്. 1400 മുതല്‍ 1500 ദീനാര്‍ വരെയായി നിരക്ക് ഉയര്‍ത്തണമെന്നാണ് അവരുടെ ആവശ്യം. കോവിഡ് പശ്ചാത്തലത്തില്‍ കുവൈത്തിലേക്ക് വരുന്നതിനു മുമ്പ് തൊഴിലാളികള്‍ക്ക് വിദേശത്ത് പരിശീലനം നല്‍കുന്നുണ്ട്. ഇതിനുള്ള ചെലവും കണ്ടെത്തേണ്ടിയിരിക്കുന്നതാണ് വെല്ലുവിളി.
