തിരുവനന്തപുരം: കെഎസ് ആര്‍ടിസിയില്‍ വ്യാപക ക്രമക്കേടുണ്ടെന്ന എംഡി ബിജു പ്രഭാകറിന്റെ പ്രസ്താവനക്കെതിരെ സിഐടിയു. തൊഴിലാളികളെ പൊതു സമൂഹത്തിന് മുന്നില്‍ അപഹസിക്കാനാണ് എംഡിയുടെ ശ്രമമെന്ന് സിഐടിയു വ്യക്തമാക്കി. എംഡിയുടെ പ്രസ്താവന അനുചിതമായിപ്പോയെന്നും ക്രമക്കേടുണ്ടെങ്കില്‍ കുറ്റക്കാര്‍ക്കെതിരെ നിയമപരമായ നടപടിയാണ് സ്വീകരിക്കേണ്ടതെന്നും ദേശീയ സെക്രട്ടറി എളമരം കരീം പറഞ്ഞു.
പ്രസംഗം നടത്തി വിവാദമുണ്ടാക്കാന്‍ ശ്രമിക്കരുതെന്നും ഇത്തരം പ്രസ്താവനകള്‍ ഒഴിവാക്കണമെന്നും അദ്ദേഹം ഉത്തരവാദിത്വത്തോടെ പെരുമാറണമെന്നും എളമരം കരീം ആവശ്യപ്പെട്ടു. കെഎസ്ആര്‍ടിസിയിലെ എല്ലാ മേഖലകളിലും വ്യാപക ക്രമക്കേടാണ് നടന്നതെന്നും അടിമുടി അഴിച്ചുപണി വേണമെന്നും എംഡി വ്യക്തമാക്കിയിരുന്നു. 2012-15 കാലഘട്ടത്തിലെ 100 കോടിയോളം രൂപ കാണാനില്ലെന്നും അന്നത്തെ അക്കൗണ്‍സ് മാനേജര്‍ക്കെതിരെ നടപടി സ്വീകരിക്കണമെന്നും ബിജു പ്രഭാകര്‍ പറഞ്ഞിരുന്നു.
