ചെന്നൈ: സിനിമ തിയറ്ററുകളില്‍ മുഴുവന്‍ സീറ്റുകളിലും പ്രവേശനം അനുവദിച്ച ഉത്തരവ്
തമിഴ്നാട് സര്‍ക്കാര്‍ റദ്ദാക്കി. കേന്ദ്ര സര്‍ക്കാരിന്റെ എതിര്‍പ്പിനെ തുടര്‍ന്നാണ് നടപടി. മുഴുവന്‍ സീറ്റിലും ആളുകളെ അനുവദിക്കാനുളള തമിഴ്നാട് സര്‍ക്കാരിന്റെ തീരുമാനം പിന്‍വലിക്കാന്‍ കേന്ദ്ര സര്‍ക്കാര്‍ നേരത്തെ ആവശ്യപ്പെട്ടിരുന്നു. തിയറ്ററുകളില്‍ 50 ശതമാനം ആളുകളെ മാത്രമേ അനുവദിക്കാവൂ എന്നായിരുന്നു കേന്ദ്ര സര്‍ക്കാരിന്റെ നിര്‍ദേശം. കോവിഡ് പ്രോട്ടോക്കോള്‍ ലംഘനം ചൂണ്ടിക്കാട്ടിയായിരുന്നു കേന്ദ്രസര്‍ക്കാര്‍ നിര്‍ദേശം. തമിഴ്നാട് സര്‍ക്കാര്‍ ഉത്തരവ് റദ്ദാക്കിയതോടെ റിലീസ് തീയതി പ്രഖ്യാപിച്ച നിരവധി സിനിമകളാണ് ഇപ്പോള്‍ പ്രതിസന്ധിയിലായിരിക്കുന്നത്.
സിനിമ തിയറ്ററുകളിലും മള്‍ട്ടിപ്ലക്സുകളിലും മുഴുവന്‍ സീറ്റുകളിലും കാണികളെ അനുവദിച്ചു കൊണ്ട് തമിഴ്നാട് സര്‍ക്കാര്‍ ഉത്തരവിറക്കിയിരുന്നു. കേന്ദ്ര സര്‍ക്കാര്‍ മാനദണ്ഡം മറികടന്നു കൊണ്ടായിരുന്നു തമിഴ്നാട് ചീഫ് സെക്രട്ടറി പുതിയ ഉത്തരവ് ഇറക്കിയിരുന്നത്. നിരവധി സിനിമകളാണ് റിലീസിനായി തയ്യാറായിരിക്കുന്നത്.
