തിരുവനന്തപുരം: കര്‍ഷക നിയമം വോട്ടിനിട്ട് തള്ളാന്‍ നാളെ നിയമസഭ ചേരാനാവില്ല. അനുമതി ആവശ്യപ്പെട്ട് സ്പീക്കര്‍ വീണ്ടും ഗവര്‍ണര്‍ക്ക് കത്ത് നല്‍കി. ഗവര്‍ണര്‍ അനുമതി നല്‍കുമെന്നാണ് പ്രതീക്ഷയെന്ന് മന്ത്രി വി.എസ് സുനില്‍കുമാര്‍ പറഞ്ഞു. ഗവര്‍ണര്‍ക്ക് ആവശ്യമായ വിശദീകരണം നല്‍കിയിട്ടുണ്ടെന്ന് മന്ത്രി പറഞ്ഞു.
എന്ത് അടിയന്തര സാഹചര്യത്തിലാണ് സഭ ചേരുന്നതെന്നാണ് സര്‍ക്കാരിനോട് ഗവര്‍ണര്‍ ചോദിച്ചത്. സഭാ സമ്മേളനം നേരത്തെ ചേരാന്‍ ഉള്ള സാഹചര്യം വിശദീകരിക്കണമെന്നാണ് ഗവര്‍ണര്‍ ആവശ്യപ്പെട്ടത്.
കേന്ദ്രം നടപ്പാക്കിയ കാര്‍ഷിക പരിഷ്‌കരണ നിയമങ്ങള്‍ക്കെതിരെ ബദല്‍ നിയമം കൊണ്ടുവരാനാണ് സര്‍ക്കാര്‍ ആലോചിക്കുന്നത്. പ്രത്യേക നിയമസഭാ സമ്മേളനം ചേര്‍ന്ന് കേന്ദ്ര കാര്‍ഷിക നിയമ ഭേദഗതി വോട്ടിനിട്ട് തള്ളിക്കളയാനാണ് ആലോചന. പ്രതിപക്ഷത്തിന്റെ പിന്തുണയും ഇക്കാര്യത്തില്‍ സര്‍ക്കാരിനുണ്ട്. നാളെ ഒരു മണിക്കൂര്‍ പ്രത്യേക നിയമസഭാ സമ്മേളനം ചേരാനായിരുന്നു കഴിഞ്ഞ മന്ത്രിസഭാ യോഗത്തിന്റെ തീരുമാനം.
