റിയാദ്: സൗദി അറേബ്യയുടെ തൊഴില്‍ രംഗത്ത് കൂടുതല്‍ മേഖലകളില്‍ സ്വദേശിവത്കരണം നടപ്പാക്കുന്നു. അക്കൗണ്ടിങ്, ഐടി, ടെലികോം എഞ്ചിനീയറിങ് ജോലികള്‍ സ്വദേശിവല്‍കരിക്കും എന്നാണ് സൗദി തൊഴില്‍ മന്ത്രാലയം അറിയിച്ചത്. മലയാളി യുവാക്കള്‍ കൂടുതലായി ജോലി തിരഞ്ഞിരുന്ന മേഖലകളാണ് സൗദി സ്വദേശിവല്‍കരിക്കുന്നത്.
പുതിയ തീരുമാനത്തിലൂടെ സ്വദേശികളായ തൊഴില്‍രഹിതരുടെ നിരക്ക് കുറക്കാനാവുമെന്നാണ് മന്ത്രാലയം പറയുന്നത്. ഉയര്‍ന്ന യോഗ്യതയുള്ള സൗദി യുവതിയുവാക്കള്‍ക്ക് കൂടുതല്‍ തൊഴിലവസരങ്ങള്‍ ലഭ്യമാക്കുന്നതിനായി മന്ത്രാലയം ശ്രമിച്ചു വരുന്നതായി മന്ത്രി അറിയിച്ചു. ഈ മേഖലകളില്‍ ബിരുദധാരികളായ നിരവധി സൗദി യുവാക്കളുണ്ടെന്നും മന്ത്രാലയം വ്യക്തമാക്കി. ഈ വര്‍ഷം 150000 സൗദികള്‍ക്കാണ് മറ്റു മേഖലകളിലെ സ്വദേശിവല്‍ക്കരണത്തിലൂടെ ജോലി ലഭിച്ചത്.
