തിരുവനന്തപുരം: പണം തിരിച്ചടക്കാത്തവരുടെ വിവരങ്ങള് സിബിലില് കയറ്റാന് തുടങ്ങിയതോടെ സംസ്ഥാന ധനകാര്യ സ്ഥാപനമായ കേരള ഫിനാന്ഷ്യല് കോര്പറേഷന്റെ വായ്പ തിരിച്ചടവില് വര്ധന. ഏകദേശം 18,500 പേരുടെ വിവരങ്ങള് സിബിലില് ഇതുവരെ അപ്ലോഡ് ചെയ്തു കഴിഞ്ഞു. ഇനി ഏകദേശം ആയിരം പേരുടെ വിവരങ്ങള് കുടി അപ്ലോഡ് ചെയ്യാനുണ്ട്.
സിബില് അപ്ഡേറ്റ് ചെയ്യാനായി കെഎഫ്സി ഒന്നും തന്നെ ലഭ്യമല്ലാത്ത പഴയ കേസുകളാണ് ഇനി ബാക്കി ഉള്ളത്. അതായത് അവരുടെ പാന്കാര്ഡ്, ആധാര് കാര്ഡ്, പാസ്പോര്ട്ട്, റേഷന് കാര്ഡ്, ഡ്രൈവിംഗ് ലൈസന്സ്, വോട്ടേഴ്സ് ഐഡി ഒന്നും തന്നെ ഫയലില് ലഭ്യമല്ലാത്ത കേസുകളാണവ. ഇത്തരം കേസുകളില് വിവരങ്ങള് ശേഖരിക്കുന്നതിനു കസ്റ്റമര് വെരിഫിക്കേഷന് ഏജന്റുകളെ ഏല്പ്പിച്ചിട്ടുണ്ട്.
വായ്പ എടുത്തിട്ട് തിരിച്ചടക്കാതിരിക്കുക, വായ്പകള് പുനര്ക്രമീകരിക്കുക, ഒറ്റത്തവണ വഴി തീര്പ്പാക്കുക, എഴുതിത്തള്ളുക തുടങ്ങിയ സാഹചര്യങ്ങളിലാണ് സിബില് സ്കോര് മോശമാകുന്നത്. സിബില് മോശമായാല് ഒരു ബാങ്കില് നിന്നും വായ്പകള് കിട്ടില്ല. മുമ്പ് ഒറ്റത്തവണ തീര്പ്പാക്കലിലൂടെ വായ്പാ തിരിച്ചടച്ചവരും അവരുടെ സിവില് സ്കോര് മോശമാകുന്നതിനാല് ഇപ്പോള് പണം തിരിച്ചടയ്ക്കാന് തയ്യാറായി വന്നിട്ടുണ്ടെന്ന് കെഫ്സി സിഎംഡി ടോമിന് ജെ. തച്ചങ്കരി അറിയിച്ചു.
സിബില് പരാതികള് പരിശോദിക്കുന്നതിന് പ്രത്യേകം സംവിധാനവും കെഫ്സി ആരംഭിച്ചിട്ടുണ്ട്. കെഫ്സിയുടെ ഈ വര്ഷത്തെ വായ്പാ തിരിച്ചടവ് ഇതുവരെ 1241 കോടി രൂപയായി. കഴിഞ്ഞ വര്ഷം ഈ കാലയളവില് 710 കോടിയായിരുന്നു. ഈ വര്ഷം ഇതുവരെ 2262 കോടി രൂപ വായ്പയായി അനുവദിച്ചു. കഴിഞ്ഞ വര്ഷം ഈ കാലയളവില് 395 കോടിയായിരുന്നു. വായ്പാ വിതരണത്തിലും വന് വര്ധന ഉണ്ടാക്കാന് കഴിഞ്ഞെന്നും സിഎംഡി അറിയിച്ചു. ഈ വര്ഷം ഇതുവരെ 2389 കോടി രൂപ വായ്പയായി വിതരണം ചെയ്തു. കഴിഞ്ഞ വര്ഷം ഈ കാലയളവില് 521 കോടിയായിരുന്നു.
ഒരു ലക്ഷം വരെ ഈട് ഇല്ലാതെ വായ്പ നല്കുന്ന സംരംഭക പദ്ധതിയില് ഇതുവരെ 8000 അപേക്ഷകള് കിട്ടിയിട്ടുണ്ട്. ഇതിന്റെ പരിശോധനകള് നടന്നു വരുകയാണ്. ഇലക്ട്രിക് വാഹനങ്ങളുടെ വായ്പകള്ക്കും വളരെ നല്ല പ്രതികരണമാണ് ലഭിക്കുന്നതെന്നു കെഫ്സി അറിയിച്ചു.
