തിരുവനന്തപുരം: ആദ്യഘട്ട തദ്ദേശ തെരഞ്ഞെടുപ്പിനുള്ള പരസ്യ പ്രചരണം ഇന്ന് അവസാനിക്കും. കോവിഡ് സാഹചര്യം ആയതിനാല്‍ ഇത്തവണ കൊട്ടിക്കലാശമില്ലെങ്കിലും തങ്ങളുടെ വോട്ടുറപ്പിക്കാന്‍ സ്ഥാനാര്‍ത്ഥികളും നേതാക്കളും രംഗത്തിറങ്ങും. സോഷ്യല്‍ മീഡിയ വഴിയുള്ള പ്രചരണങ്ങളും മുന്നണികള്‍ കൊഴുപ്പിക്കുകയാണ്.
ആദ്യഘട്ടത്തില്‍ വാശിയേറിയ മത്സരം നടക്കുന്ന തിരുവനന്തപുരം കോര്‍പ്പറേഷന്‍ പിടിച്ചടക്കുമെന്നാണ് മൂന്ന് മുന്നണികളുടേയും അവകാശവാദം. ആവേശം ചോരാതെ കോവിഡ് മാനദണ്ഡങ്ങള്‍ പാലിച്ച് അവസാന പ്രചരണ ദിനം കൊഴുപ്പിക്കാനാണ് തീരുമാനം. അവസാനദിനം കേന്ദ്രീകൃത കലാശക്കൊട്ട് ഒഴിവാക്കി വാര്‍ഡുകള്‍ തോറും റാലികളും വാഹന പര്യടനവും നടത്തി ആഘോഷമാക്കും.
അതേസമയം തങ്ങളെ തോല്‍പ്പിക്കാന്‍ യുഡിഎഫും ബിജെപിയും ഒത്തുകളിക്കുന്നു എന്ന ആരോപണം എല്‍ഡിഎഫ് ഉയര്‍ത്തുന്നുണ്ട്. ഘടകക്ഷികള്‍ മത്സരിക്കുന്നതടക്കം ഇരുപതോളം സീറ്റില്‍ ധാരണയെന്നാണ് ആരോപണം.
