മസ്കത്ത്: കോവിഡ് പ്രോട്ടോകോളും സുപ്രീം കമ്മിറ്റി നിര്‍ദേശങ്ങളും ലംഘിച്ച 42 പേര്‍ക്ക് വിവിധ കോടതികള്‍ ശിക്ഷ വിധിച്ചു. ശിക്ഷ ലഭിച്ചവരില്‍ ഒമ്പതുപേര്‍ സ്വദേശികളും 20 പേര്‍ ഫിലിപ്പീന്‍സുകാരും ഒമ്പതു പേര്‍ ബംഗ്ലാദേശികളും മൂന്നുപേര്‍ ഇന്ത്യക്കാരും ഒരാള്‍ പാകിസ്താനിയുമാണ്. ബുറൈമി, മുസന്ദം, തെക്കന്‍ ശര്‍ഖിയ, ദോഫാര്‍ ഗവര്‍ണറേറ്റുകളിലെ ഫസ്റ്റ് ഇന്‍സ്റ്റന്‍സ് കോടതികളാണ് സ്വദേശികള്‍ക്കും വിദേശികള്‍ക്കും ശിക്ഷ വിധിച്ചത്. മൂന്നു മാസം തടവ് മുതല്‍ ആയിരം റിയാല്‍ പിഴ വരെയാണ് ശിക്ഷ.
ശിക്ഷാ കാലാവധിക്ക് ശേഷം വിദേശികളെ നാടു കടത്തുമെന്നും വിധിയില്‍ പറയുന്നു. പബ്ലിക് പ്രോസിക്യൂഷന്‍ ഇവരുടെ പേരുകളും ചിത്രങ്ങളും പ്രസിദ്ധീകരിച്ചു. നവംബര്‍ 24 മുതല്‍ ഡിസംബര്‍ മൂന്ന് വരെ കാലയളവില്‍ അനധികൃത ഒത്തുചേരല്‍, രാത്രിസഞ്ചാരവിലക്കിന്റെ സമയം പുറത്തിറങ്ങല്‍, മുഖാവരണം ധരിക്കാതിരിക്കല്‍ തുടങ്ങിയ നിയമലംഘനങ്ങള്‍ക്കാണ് ശിക്ഷയെന്നും പബ്ലിക് പ്രോസിക്യൂഷന്‍ അറിയിച്ചു. കോവിഡുമായി ബന്ധപ്പെട്ട കുറെ നിയന്ത്രണം നീക്കിയെങ്കിലും പ്രതിരോധ നടപടി പാലിക്കാന്‍ അധികൃതര്‍ ആവശ്യപ്പെട്ടിട്ടുണ്ട്.
