ഒട്ടാവ: ഇന്ത്യയിലെ കര്ഷക പ്രതിഷേധങ്ങള്ക്ക് പിന്തുണയുമായി വീണ്ടും കനേഡിയന് പ്രധാനമന്ത്രി ജസ്റ്റിന് ട്രൂഡോ. സമാധാനപരമായ പ്രതിഷേധങ്ങള്ക്കും മനുഷ്യാവകാശത്തിനും വേണ്ടി കാനഡ എക്കാലവും നിലകൊള്ളുമെന്ന് ട്രൂഡോ ആവര്ത്തിച്ചു.
ഡല്ഹി-ഹരിയാന അതിര്ത്തിയില് നടക്കുന്ന കര്ഷ പ്രതിഷേധങ്ങളെ നേരത്തെ പിന്തുണച്ചതില് ഇന്ത്യ പ്രതിഷേധം അറിയിച്ചിരുന്നു. എന്നാല് വെള്ളിയാഴ്ച മാധ്യമങ്ങളോട് സംസാരിക്കവെയാണ് തന്റെ നിലപാടില് മാറ്റം വരുത്താതെ ട്രൂഡോ കര്ഷകരോടുള്ള പിന്തുണ വീണ്ടും വ്യക്തമാക്കിയത്.
കേന്ദ്ര സര്ക്കാര് നടപ്പിലാക്കിയ പുതിയ കാര്ഷിക നയങ്ങള് പിന്വലിക്കണമെന്ന ആവശഅയവുമായി കര്ഷകര് ആരംഭിച്ച പ്രതിഷേധത്തിന് പിന്തുണയുമായി ട്രൂഡോ എത്തിയതിനെതിരെ കനേഡിയന് ഹൈക്കമ്മീഷണറെ വിളിച്ചുവരുത്തിയാണ് സര്ക്കാര് പ്രതിഷേധമറിയിച്ചത്.
കനേഡിയന് പ്രധാനമന്ത്രി കര്ഷക പ്രതിഷേധത്തെ കുറിച്ച് നടത്തിയ പ്രസ്താവന ഇന്ത്യയുടെ ആഭ്യന്തര കാര്യങ്ങളിലുള്ള ഇടപെടലാണെന്നും ഇത് അംഗീകരിക്കാനാവില്ലെന്നും സര്ക്കാര് അറിയിച്ചു. വിഷയത്തില് പ്രതികരിച്ച മറ്റു രാജ്യങ്ങളെയും സര്ക്കാര് വിമര്ശിച്ചിരുന്നു.
ഇന്ത്യയില് നടക്കുന്ന കര്ഷക പ്രക്ഷോഭത്തോട് സര്ക്കാര് സ്വീകരിക്കുന്ന സമീപനത്തില് ആശങ്കയറിയിച്ച് ജസ്റ്റിന് ട്രൂഡോ ചൊവ്വാഴ്ചയായിരുന്നു ആദ്യമായി രംഗത്തെത്തിയത്. ഈ ആശങ്ക ഇന്ത്യന് സര്ക്കാറിനെ എത്രയും പെട്ടെന്ന് അറിയിക്കുമെന്ന് അദ്ദേഹം പറഞ്ഞിരുന്നു.
കര്ഷക പ്രതിഷേധത്തെക്കുറിച്ച് ഇന്ത്യയില് നിന്ന് വരുന്ന വാര്ത്ത അവഗണിച്ചുകളയാന് സാധിക്കില്ലെന്ന് പറഞ്ഞ അദ്ദേഹം സമാധാനപരമായ പ്രതിഷേധങ്ങള്ക്കൊപ്പം കാനഡ എപ്പോഴും നിലകൊള്ളുമെന്നും വ്യക്തമാക്കി. ഇന്ത്യയിലെ കര്ഷക സമരത്തില് പ്രതികരണവുമായി രംഗത്തെത്തിയ ആദ്യ വിദേശ നേതാവും ജസ്റ്റിന് ട്രൂഡോ ആണ്.
