കോവിഡ് കാലയളവില്‍ വീടുകളില്‍ ചെലവിടുന്ന സമയവും സാഹചര്യവും ഫലവത്തായി ക്രിയാത്മക പ്രവര്‍ത്തനങ്ങളില്‍ ഏര്‍പ്പെടുന്നതിനു വി.എച്ച്.എസ്.ഇ വിദ്യാര്‍ത്ഥികളെ ഏകോപിപ്പിക്കാന്‍ ‘ഹിതം ഹരിതം’ പദ്ധതിയുമായി വി.എച്ച്.എസ്.ഇ എന്‍.എസ്.എസ്. സംസ്ഥാനമൊട്ടാകെയുള്ള വി.എച്ച്.എസ്.ഇ സ്‌കൂളുകളില്‍ നിന്നു താത്പര്യമുള്ള വിദ്യാര്‍ത്ഥികളെ തെരഞ്ഞെടുത്ത് ‘വിദ്യാര്‍ത്ഥി സൗഹൃദ വീട്ടുകൃഷി രീതികളില്‍’ കേരള സര്‍വകലാശാലയുടെ സഹായത്തോടെ സര്‍ട്ടിഫിക്കേഷനോടെ സൗജന്യമായി ഓണ്‍ലൈന്‍ പരിശീലനം കൊടുത്ത്, തുടര്‍ പിന്തുണ പ്രവര്‍ത്തനങ്ങള്‍ ഉറപ്പാക്കി, അവരവരുടെ വീടുകളിലിരുന്ന് സ്വയം ഹരിത സംരംഭകരാകാന്‍ വിദ്യാര്‍ഥികളെ സന്നദ്ധരാക്കുകയാണ് പദ്ധതിയുടെ ലക്ഷ്യം.
‘വിദ്യാര്‍ത്ഥി സൗഹൃദ വീട്ടുകൃഷി രീതികളില്‍’ കേരളത്തിലെ പ്രഗത്ഭരായ കാര്‍ഷിക വിദഗ്ദ്ധര്‍ പങ്കെടുക്കുന്ന ഡിസംബര്‍ ഒന്ന് മുതല്‍ അഞ്ച് വരെ നീണ്ടു നില്‍ക്കുന്ന പരിശീലന പരിപാടിക്ക് യൂണിവേഴ്സിറ്റി ഡയറക്ടറേറ്റ് ഓഫ് എക്സ്റ്റന്‍ഷന്‍ മേധാവി ഡോ. ജിജു പി അലക്സ് നേതൃത്വം കൊടുക്കും. 5000 ത്തോളം വിദ്യാര്‍ത്ഥികളും രക്ഷിതാക്കളും അധ്യാപകരും ഓണ്‍ലൈനായി പങ്കെടുക്കുന്ന പരിശീലന പരിപാടിയില്‍ ആദ്യ ദിനത്തില്‍ പൊതു വിദ്യാഭ്യാസ ഡയറക്ടര്‍ ജീവന്‍ ബാബു. കെ വിദ്യാര്‍ഥികളോട് സംവദിക്കും.
