ന്യൂഡല്ഹി: കേരള പോലീസ് ആക്ട് ഭേദഗതിക്കെതിരെ മുതിര്ന്ന അഭിഭാഷകനും ആക്ടിവിസ്റ്റുമായ പ്രശാന്ത് ഭൂഷണ്. ഇത് ക്രൂരവും വിമത ശബ്ദങ്ങളെ അടിച്ചമര്ത്തുകയും ചെയ്യുന്ന നിയമമാണ്. ഐടി ആക്ടില് നിന്ന് ഒഴിവാക്കിയ സെക്ഷന് 66 (എ)യ്ക്ക് സമാനമാണിത്,’ പ്രശാന്ത് ഭൂഷണ് ട്വീറ്റ് ചെയ്തു.
കഴിഞ്ഞ ദിവസമാണ് സൈബര് ആക്രമണങ്ങള് തടയാന് സംസ്ഥാന സര്ക്കാര് കൊണ്ടുവന്ന പൊലീസ് നിയമ ഭേദഗതിയ്ക്ക് ഗവര്ണര് അംഗീകാരം നല്കിയത്. പൊലീസ് നിയമത്തില് 118 എ എന്ന വകുപ്പ് കൂട്ടിച്ചേര്ത്താണ് ഭേദഗതി ചെയ്തിരിക്കുന്നത്. കേരള പോലീസ് നിയമത്തില് 118 (എ) എന്ന പുതിയ വകുപ്പ് ഉള്ക്കൊള്ളുന്ന ഓര്ഡിനന്സില് ഒപ്പിട്ടതായി ഖാന്റെ ഓഫീസ് ശനിയാഴ്ച സ്ഥിരീകരിച്ചു. വകുപ്പ് പ്രകാരം ഏതെങ്കിലും ആശയവിനിമയത്തിലൂടെ ഏതെങ്കിലും വ്യക്തിയെ അപകീര്ത്തിപ്പെടുത്തുന്നതോ ഭീഷണിപ്പെടുത്തുന്നതോ ആയ വിവരങ്ങള് സൃഷ്ടിക്കുകയോ അയയ്ക്കുകയോ ചെയ്യുന്നയാള്ക്ക് അഞ്ച് വര്ഷം തടവും 10,000 രൂപ പിഴയോ അല്ലെങ്കില് രണ്ടും കൂടിയോ ചുമത്തും.
വ്യക്തികളെ ലക്ഷ്യമിട്ട് സോഷ്യല് മീഡിയയില് വര്ദ്ധിച്ചുവരുന്ന ദുരുപയോഗമാണ് തീരുമാനത്തിന് വഴികാട്ടിയെന്ന് മുഖ്യമന്ത്രി പിണറായി വിജയന് അവകാശപ്പെട്ടു. എന്നാല് ഈ ഭേദഗതി പൊലീസിന് കൂടുതല് അധികാരം നല്കുക വഴി മാധ്യമസ്വാതന്ത്ര്യത്തെ നിയന്ത്രിക്കുകയും അഭിപ്രായ സ്വാതന്ത്ര്യത്തെ ഹനിക്കുകയും ചെയ്യുമെന്ന് ആശങ്കയുണ്ട്.
.
