ജയ്പൂര്: ജൈനാചാര്യന് വിജയ് വല്ലഭ് സുരീശ്വര് ജി മഹാരാജിന്റെ സമാധാന പ്രതിമ പ്രധാനമന്ത്രി നരേന്ദ്ര മോദി അനാച്ഛാദനം ചെയ്തു. ജൈനാചാര്യന് വിജയ് വല്ലഭയോടുളള ബഹുമാനാര്ത്ഥം അദ്ദേഹത്തിന്റെ 151-ാംമത് ജന്മവാര്ഷിക ദിനത്തിലാണ് പ്രതിമ നാടിനായി സമര്പ്പിച്ചത്.
വീഡിയോ കോണ്ഫറന്സിലൂടെയാണ് പ്രധാനമന്ത്രി പ്രതിമ അനാച്ഛാദനം ചെയ്തത്. ചെമ്പ് പ്രധാന ഘടകമായി 8 ലോഹങ്ങള് ചേര്ത്താണ് 151 ഇഞ്ച് ഉയരമുള്ള പ്രതിമ നിര്മ്മിച്ചിരിക്കുന്നത്. രാജസ്ഥാനിലെ പാലിയില് ജത്പുരയില് ഉള്ള വിജയ് വല്ലഭ് സാധനാ കേന്ദ്രത്തിലാണ് പ്രതിമ സ്ഥാപിച്ചിരിക്കുന്നത്.
ജൈനാചാര്യനും ചടങ്ങില് പങ്കെടുത്ത ആത്മീയ നേതാക്കള്ക്കും പ്രധാനമന്ത്രി ആദരം അര്പ്പിച്ചു. സമാധാനം, അഹിംസാ,സൗഹൃദം എന്നിവയുടെ പാതയാണ് ഇന്ത്യ എപ്പോഴും സ്വീകരിച്ചിട്ടുള്ളതെന്ന് പ്രധാനമന്ത്രി പറഞ്ഞു. ഇന്ന് ലോകം സമാന മാര്ഗ ദര്ശനത്തിനായി ഇന്ത്യയിലേക്ക് ഉറ്റുനോക്കുന്നു. ആവശ്യം വരുമ്പോഴെല്ലാം സമൂഹത്തെ നയിക്കാനായി ഒരു സന്യാസിവര്യന് ആവിര്ഭവിക്കാറുള്ളതായി ഇന്ത്യയുടെ ചരിത്രം പരിശോധിച്ചാല് മനസ്സിലാകും. ആചാര്യ വിജയ് വല്ലഭ് അത്തരത്തിലൊരു സന്യാസിവര്യന് ആണെന്ന് പ്രധാനമന്ത്രി പറഞ്ഞു.
ആചാര്യന് സ്ഥാപിച്ച വിദ്യാഭ്യാസ സ്ഥാപനങ്ങളെ കുറിച്ച് പരാമര്ശിച്ച പ്രധാനമന്ത്രി, ഇന്ത്യന് സംസ്കാര മൂല്യങ്ങള് ഉള്ക്കൊള്ളുന്ന നിരവധി വിദ്യാഭ്യാസ കേന്ദ്രങ്ങള് സ്ഥാപിക്കുക വഴി വിദ്യാഭ്യാസ മേഖലയില് സ്വാശ്രയത്വം കൈവരിക്കാന് അദ്ദേഹം നടത്തിയ ശ്രമങ്ങളെയും പ്രശംസിച്ചു. പഞ്ചാബ്, രാജസ്ഥാന്, ഗുജറാത്ത്, മഹാരാഷ്ട്ര, ഉത്തര്പ്രദേശ് എന്നിവിടങ്ങളില് ജൈനാചാര്യന് വിദ്യാഭ്യാസ കേന്ദ്രങ്ങള് സ്ഥാപിച്ചതായി പ്രധാനമന്ത്രി പറഞ്ഞു. സ്ത്രീകളുടെ വിദ്യാഭ്യാസത്തിനായി ഈ സ്ഥാപനങ്ങള് നല്കുന്ന സംഭാവനയ്ക്ക് രാജ്യം കടപ്പെട്ടിരിക്കുന്നതായും അദ്ദേഹം കൂട്ടിച്ചേര്ത്തു.
