തിരുവനന്തപുരം: കിഫ്ബിയെ തകര്‍ക്കാന്‍ സിഎജി ശ്രമിച്ചുവെന്ന ധനമന്ത്രി തോമസ് ഐസകിന്റെ ആരോപണത്തിനെതിരെ രൂക്ഷ വിമര്‍ശനവുമായി പ്രതിപക്ഷ നേതാവ് രമേശ് ചെന്നിത്തല. അഴിമതി മൂടിവെക്കാന്‍ സിഎജി പോലെ ഭരണഘടനാപരമായ സ്ഥാപനത്തെ അപമാനിക്കാന്‍ ശ്രമിക്കുന്നു. ആരും കണക്ക് ചോദിക്കേണ്ടെന്ന് തോമസ് ഐസക് എകെജി സെന്ററില്‍ പോയി പറഞ്ഞാല്‍ മതിയെന്നും പ്രതിപക്ഷ നേതാവ് തുറന്നടിച്ചു.
നിയമസഭയില്‍ വെക്കാത്ത കരട് പുറത്തുവിട്ട നടപടി ഗുരുതര ചട്ടലംഘനമാണെന്നും ധനമന്ത്രി തോമസ് ഐസക് നിയമങ്ങളും സത്യപ്രതിജ്ഞയും ലംഘിച്ചുവെന്നും ചെന്നിത്തല ആരോപിച്ചു. ഭരണഘടനാപരമായ ഉത്തരവാദിത്തം പാലിക്കാതെ സിഎജി റിപ്പോര്‍ട്ട് ചോര്‍ത്തിയ മന്ത്രിയുടെ നടപടി നിയമസഭയുടെ അവകാശ ലംഘനമാണെന്നും വിഷയത്തില്‍ മന്ത്രിക്ക് നോട്ടിസ് നല്‍കുമെന്നും പ്രതിപക്ഷ നേതാവ് പറഞ്ഞു.
അതേസമയം സിഎജിയുടെ ഓഫീസുമായി ബന്ധമില്ലെന്നും നാലരവര്‍ഷത്തിനിടെ ഒരിക്കല്‍പ്പോലും ബന്ധപ്പെട്ടിട്ടില്ലെന്നും ചെന്നിത്തല പറഞ്ഞു. നിയമസഭയില്‍ വെക്കും മുന്‍പ് എജിയുടെ ഒരു റിപ്പോര്‍ട്ടും തനിക്ക് കിട്ടിയിട്ടില്ല. അഴിമതി കണ്ടെത്തിയതിന്റെ പേരില്‍ സിഎജിയെ അപമാനിക്കാന്‍ ശ്രമിക്കുകയാണെന്നും ചെന്നിത്തല ചൂണ്ടിക്കാട്ടി.
