തിരുവനന്തപുരം: ജോസ് കെ മാണിയുടെ നേതൃത്വത്തിലുള്ള കേരളാ കോണ്‍ഗ്രസ് എമ്മിന്റെ എല്‍ഡിഎഫ് പ്രവേശനത്തിന് ഔദ്യോഗിക അംഗീകാരം. തിരുവനന്തപുരത്ത് ചേര്‍ന്ന യോഗത്തിലാണ് ജോസ് കെ മാണി വിഭാഗത്തെ ഇടതു മുന്നണിയുടെ ഘടക കക്ഷിയാക്കാന്‍ ധാരണയായത്. മുഖ്യമന്ത്രി പിണറായി വിജയന്റെ നിര്‍ദേശം ഘടക കക്ഷികള്‍ അംഗീകരിക്കുകയായിരുന്നു.
എല്‍ഡിഎഫ് കണ്‍വീനര്‍ എ.വിജയരാഘവനാണ് ജോസ് വിഭാഗത്തെ മുന്നണിയില്‍ എടുക്കാമെന്ന നിര്‍ദേശം അവരിപ്പിച്ചത്. ഇത് സിപിഐ ഉള്‍പ്പെടെയുള്ള എല്ലാ ഘടക കക്ഷികളും അംഗീകരിക്കുകയായിരുന്നു.
അതേസമയം സിറ്റിങ് സീറ്റുകളില്‍ ആശങ്കയറിയിച്ച് എന്‍സിപി രംഗത്തെത്തി. പാലായില്‍ എന്തെങ്കിലും ധാരണയുണ്ടെങ്കില്‍ അത് വ്യക്തമാക്കണമെന്ന് യോഗത്തില്‍ എന്‍സിപി ആവശ്യപ്പെട്ടു. എന്നാല്‍ ഇക്കാര്യം സംബന്ധിച്ച് പിന്നീട് ചര്‍ച്ചയാകാമെന്നും തല്‍ക്കാലം യുഡിഎഫ് ദുര്‍ബലമാകുന്നതാണ് പ്രധാനമെന്നും മുഖ്യമന്ത്രി പറഞ്ഞു.
