പാര്ലമെന്റ് നടപടികള് ഭംഗിയായി മുന്നോട്ടു കൊണ്ടുപോകാന് എംപിമാരുടെ സഹായം അഭ്യര്ത്ഥിച്ച പ്രധാനമന്ത്രിക്ക് മറുപടിയുമായി കോണ്ഗ്രസ് നേതാവ് ജയ്റാം രമേശ്. നിങ്ങള് ഇവിടെ ഇരിക്കുകയാണെങ്കില് ദേശീയ താല്പ്പര്യം മുന്നിര്ത്തി പ്രതിപക്ഷം ഉന്നയിക്കുന്ന ചോദ്യങ്ങള് കേള്ക്കാനും അതിന് ഉത്തരം നല്കാനും നിങ്ങള്ക്ക് കഴിയണമെന്ന് ജയ്റാം പറഞ്ഞു.
മൂന്ന് ചോദ്യങ്ങളാണ് ഞങ്ങള്ക്ക് ചോദിക്കാനുളളതെന്ന് അദ്ദേഹം കൂട്ടിച്ചേര്ത്തു. അതില് ഒന്ന് കോവിഡിനെ കുറിച്ചും മറ്റൊന്ന് സമ്പദ് വ്യവസ്ഥ തകര്ന്നടിഞ്ഞതിനെ കുറിച്ചാണ്. മൂന്നാമത്തേത് ചൈനയെപ്പറ്റിയാണ് എന്നായിരുന്നു ജയ്റാം രമേശ് പ്രതികരിച്ചത്.
ലഡാക്കിലുള്ള ഇന്ത്യ-ചൈന സംഘര്ഷത്തില് കോണ്ഗ്രസ് ലോക്സഭയില് അടിയന്തര പ്രമേയത്തിന് അനുമതി തേടിയതിന് പിന്നാലെയായിരുന്നു ജയ്റാം രമേശ് നിലപാട് അറിയിച്ചത്. കോണ്ഗ്രസ് എംപി അധിര് രജ്ഞന് ചൗധരിയും കെ. സുരേഷുമാണ് അടിയന്തര പ്രമേയത്തിന് നോട്ടീസ് നല്കിയത്.നേരത്തെ പാര്ലമെന്റ് നടപടികള് ആരംഭിക്കുന്നതിന് മുന്പായി മാധ്യമങ്ങളെ കണ്ട മോദി കോവിഡ് സാഹചര്യത്തിലും പാര്ലമെന്റില് എത്തിച്ചേര്ന്ന എംപിമാരെ അഭിനന്ദിച്ചിരുന്നു.
