എറെ നാളത്തെ കാത്തിരിപ്പിനൊടുവില്‍ ഒമാനില്‍ ഒക്ടോബര്‍ ഒന്നുമുതല്‍ അന്താരാഷ്ട്ര വിമാന സര്‍വീസുകള്‍ പുനരാരംഭിക്കും. കോവിഡ് പ്രതിരോധ പ്രവര്‍ത്തനങ്ങളുടെ ചുമതലയുള്ള ഒമാന് സുപ്രിം കമ്മിറ്റി അറിയിച്ചു. അഭ്യന്തര മന്ത്രി സയ്യിദ് ഹമൂദ് ബിന്‍ ഫൈസല്‍ അല്‍ ബുസൈദിയുടെ അധ്യക്ഷതയില്‍ തിങ്കളാഴ്ച നടന്ന യോഗത്തിലാണ് തീരുമാനമെടുത്തത്. വിമാനത്താവളങ്ങള്‍ തുറക്കുമെങ്കിലും ഓരോ രാജ്യത്തെയും ലക്ഷ്യ സ്ഥാനങ്ങളിലെ ആരോഗ്യ വിവരങ്ങള്‍ക്കും മറ്റു വിമാനക്കമ്പനികളുമായുള്ള ഉഭയകക്ഷി ചര്‍ച്ചകളുടെയും അടിസ്ഥാനത്തിലായിരിക്കും സര്‍വീസുകള്‍ ഷെഡ്യൂള്‍ ചെയ്യുകയും ഒമാനിലേക്കുള്ള സര്‍വീസുകള്‍ അനുവദിക്കുകയും ചെയ്യുകയെന്നും അധികൃതര്‍ അറിയിച്ചു.
ഒമാന് ഫുട്‌ബോള്‍ അസോസിയേഷന് 2019-20 സീസണിലെ മത്സരങ്ങള്‍ പുനരാരംഭിക്കാനും 20-21 സീസണ്‍ മത്സരങ്ങള്‍ നടത്താനും സുപ്രീം കമ്മിറ്റി അധികാരം നല്‍ കിയിട്ടുണ്ട്. കര്‍ശനമായ കോവിഡ് പ്രതിരോധ നടപടികളോടെ കാണികളില്ലാതെ മത്സരം നടത്താനാണ് അനുമതി നല്‍കിയിട്ടുള്ളത്. കോവിഡ് പശ്ചാത്തലത്തില്‍ സ്‌കൂളുകളുടെ പ്രവര്‍ത്തനം പുനരാരംഭിക്കുന്നതിനായി വിദ്യാഭ്യാസ മന്ത്രാലയം കൈക്കൊണ്ട നടപടികളെ സുപ്രീം കമ്മിറ്റി പ്രശംസിക്കുകയും ചെയ്തു. സമഗ്രവും നിലവാരമുള്ളതുമായ വിദ്യാഭ്യാസം ഉറപ്പുവരുത്തുന്നതിനുള്ള നടപടികളാണ് വിദ്യാഭ്യാസ വകുപ്പ് കൈക്കൊണ്ടിരിക്കുന്നതെന്ന് സുപ്രീം കമ്മിറ്റി വിലയിരുത്തി.
