ഇടക്കിയില് മഴ തുടരുന്ന സാഹചര്യത്തില് മൂന്നാര് ദേവീകുളം ഭാഗങ്ങളിലെ എട്ട് കുടുംബങ്ങളെ മാറ്റിപ്പാര്പ്പിച്ചു. പ്രദേശങ്ങളില് മണ്ണിടിച്ചില് ഭീഷണിയുള്ളതിനാലാണ് കുടുംബങ്ങളെ മാറ്റിയത്. ജില്ലയില് മൂന്നാര്, പീരുമേട് ഭാഗങ്ങളിലാണ് മഴ ശക്തമായി പെയ്യുന്നത്.
ഇക്കാനഗറിലും മണ്ണിടിച്ചല് ഭീഷണിയുള്ളതിനാല് ഇവിടെയുള്ള രണ്ട് കുടുംബങ്ങളെ ക്യാമ്പിലേക്ക് മാറ്റി പാര്പ്പിച്ചു. സുരക്ഷാ മുന്കരുതലിന്റെ ഭാഗമായി മൂന്നാറില് നാല് ദുരിതാശ്വാസ ക്യാമ്പുകള് തുറന്നു. ദേവീകുളത്തെ സര്ക്കാര് സ്കൂളിലും ക്യാമ്പ് തുറന്നിട്ടുണ്ട്.
കന്നിയാറില് നീരൊഴുക്ക് ശക്തമായതിനാല് മൂന്നാര് പെരിയവരയിലെ താല്ക്കാലിക പാലം അപകടാവസ്ഥയിലായി. പാലത്തില് വെള്ളം കയറിയതോടെ രണ്ടുമണിക്കൂറോളമാണ് ഗതാഗതം നിര്ത്തിവെച്ചത്. ആദ്യ പ്രളയത്തില് തകര്ന്ന പെരിയവര പാലത്തിന് സമാന്തരമായി നിര്മ്മിച്ചതാണ് താല്ക്കാലിക പാലം.
അതേസമയം മഴയെ തുടര്ന്ന് ഇടുക്കിയിലെ ലോവര് പെരിയാര്, കല്ലാര്കുട്ടി, മലങ്കര അണക്കെട്ടുകളുടെ ഷട്ടറുകള് 50 സെന്റീമീറ്റര് വരെ ഉയര്ത്തി. പെരിയാറിന്റെ ഇരുകരകളിലും ഉള്ളവര്ക്ക് ജില്ലാ ഭരണകൂടം ജാഗ്രതാ നിര്ദേശം പുറപ്പെടുവിച്ചു.
