അബുദാബിയിൽ കർശന നിയന്ത്രണങ്ങളോടെ കൂടുതൽ ബീച്ചുകളും പാർക്കുകളും തുറന്നതായി എമിറേറ്റിലെ മുനിസിപ്പാലിറ്റി, ഗതാഗത വകുപ്പ് അറിയിച്ചു. ചില പ്രത്യേക പാർക്കുകളിലും ബീച്ചുകളിലുമുള്ള നിയന്ത്രണങ്ങൾ ക്രമേണ ലഘൂകരിക്കുന്നതിന്റെ ഭാഗമായാണ് പൊതു സൗകര്യങ്ങൾ വീണ്ടും തുറക്കുന്നത്.
#Itstartswithyou# എന്ന ഹാഷ് ടാഗിൽ ഡി.എം.ടി.യുടെ ദി ഹൈജനിക് സിറ്റി ക്യാമ്പയിനിലൂടെ , താമസക്കാർ സാമൂഹ്യ അകലം തുടരാനും എല്ലാ പൊതു സ്ഥലങ്ങളിലും മാസ്ക് ധരിക്കാനും ശക്തമായി നിർദ്ദേശിക്കുന്നു. വൈറസ് പടരാതിരിക്കുന്നതിൽ തങ്ങൾക്ക് ഒരു പ്രധാന പങ്കുണ്ടെന്നും ഏതു പൊതു സ്ഥലത്ത് ഫെയ്സ് മാസ്ക് ധരിക്കുന്നത് പരമപ്രധാനമാണെന്നും കാമ്പെയ്ൻ ഓരോ താമസക്കാരെയും ഓർമ്മിപ്പിക്കുന്നു.
വീണ്ടും തുറന്ന ഓരോ പൊതു ബീച്ചിന്റെയും പാർക്കിന്റെയും പ്രവേശന കവാടങ്ങളിൽ, സന്ദർശകരുടെ താപനില പരിശോധിക്കും. ഗ്രൂപ്പുകൾ, ദമ്പതികൾ, വ്യക്തികൾ എന്നിവർക്കായി പ്രത്യേക നിയന്ത്രണങ്ങളുണ്ട്. അതിൽ ഒരു ഗ്രൂപ്പിലെ പരമാവധി ആളുകളെ അഞ്ചായി പരിമിതപ്പെടുത്തും . ബനിയാസ് ലേഡീസ് പാർക്ക്, ഷഹാമ പാർക്ക് 2, ഷഹാമ പാർക്ക് 3, ബഹിയ പാർക്ക്, റഹ്ബ പാർക്ക്, ന്യൂ എയർപോർട്ട് ഗാർഡൻ. അൽ ഐനിൽ, നഹേൽ പാർക്ക് എന്നിവയാണ് അബുദാബിയിൽ വെള്ളിയാഴ്ച വീണ്ടും തുറന്ന പാർക്കുകൾ.അൽ ദഫ്രയിൽ സില, ഡൽമ പാർക്കുകളും തുറന്നു. ഭക്ഷണ, പാനീയ ഔട്ട്‌ലെറ്റുകൾ 30 ശതമാനം ഇരിപ്പിട ശേഷിയിൽ പ്രവർത്തിക്കുന്നുണ്ട് . ഒരു ടേബിളിന് പരമാവധി നാല് പേരും ടേബിളുകൾക്കിടയിൽ കുറഞ്ഞത് 2.5 മീറ്റർ ദൂരവും വേണം.പ്ലേ ഏരിയകൾ അടയ്ക്കുകയും 50 ശതമാനം ശേഷിയിൽ പാർക്കിംഗ് തുറക്കുകയും ചെയ്യും .
