നാളെ കർക്കിടക വാവ് ; പൊതു സ്ഥലങ്ങളിൽബലിയിടാൻ അനുവദിക്കുകയില്ല; പൊലീസിന് കർശന നിർദ്ദേശം

കോവിഡ് സമ്പർക്ക രോഗികളുടെ എണ്ണം വർദ്ധിച്ചു വരുന്ന സാഹചര്യത്തിൽ കർക്കിടക വാവുബലിയോടനുബന്ധിച്ചുള്ള ബലിതർപ്പണം പൊതു സ്ഥലങ്ങളിൽ അനുവദിക്കുകയില്ല ഇക്കൊല്ലത്തെ കർക്കിടക വാവുബലി ജനങ്ങൾ കൂട്ടം കൂടുന്ന തരത്തിലുള്ള ചടങ്ങായി നടത്താൻ അനുവദിക്കില്ലെന്ന് കഴിഞ്ഞ ദിവസം സംസ്ഥാന പോലീസ് മേധാവി ലോക്നാഥ് ബെഹ്റ വ്യക്തമാക്കിയിരുന്നു. ചടങ്ങുകൾ വീടുകളിൽ തന്നെ നടത്തണം. ഇക്കാര്യം പൊതുജനങ്ങളെയും കർക്കിടക വാവുബലി ചടങ്ങുകൾ നടത്തുന്ന സ്ഥാപനങ്ങളുടെയും ആരാധനാലയങ്ങളുടെയും മേധാവിമാരെയും അറിയിക്കാനും ജില്ലാ പോലീസ് മേധാവി മാർക്ക് കർശന  നിർദ്ദേശവും  നൽകിയിരുന്നു.

ജനങ്ങൾ കൂട്ടം കൂടുന്ന എല്ലാത്തരം മത ചടങ്ങുകളും ജൂലൈ 31 വരെ നിർത്തിവെയ്ക്കണമെന്ന കേന്ദ്ര സർക്കാർ ഉത്തരവിന്റെ അടിസ്ഥാനത്തിലാണ് നിർദേശം.