റിയാദ്: സൗദി അറേബ്യയുടെ പൊതുനിക്ഷേപ ഫണ്ട് (PIF) 2024 സാമ്പത്തിക വർഷത്തിൽ ശക്തമായ വളർച്ചയാണ് പ്രകടിപ്പിച്ചത്. ലണ്ടൻ സ്റ്റോക്ക് എക്സ്ചേഞ്ചിൽ പ്രസിദ്ധീകരിച്ച വാർഷിക സാമ്പത്തിക റിപ്പോർട്ട് പ്രകാരം, മൊത്തം ആസ്തികൾ 18% വർദ്ധിച്ചു. 2023ൽ 3.664 ലക്ഷം കോടി റിയാലായിരുന്ന ആസ്തി, 2024ൽ 4.321 ലക്ഷം കോടിയായി ഉയർന്നു.
ഫണ്ടിന്റെ മൊത്തം വരുമാനം 25% വർദ്ധിച്ച് 413 ശതകോടി റിയാലായപ്പോൾ, കഴിഞ്ഞ സാമ്പത്തിക വർഷത്തിൽ ഇത് 331 ശതകോടിയായിരുന്നു. ഈ വളർച്ചയുടെ പ്രധാന കാരണം PIF കീഴിൽ പ്രവർത്തിക്കുന്ന വിവിധ കമ്പനികളുടെ വരുമാന വർധനവാണ്.
വളർച്ചയ്ക്ക് കാരണമായ പ്രധാന ഘടകങ്ങൾ:
- ആരാംകോ ഡിവിഡന്റുകൾ,
- സാവി ഗെയിംസ്,
- സൗദി അറേബ്യൻ മൈനിംഗ് കമ്പനി,
- സൗദി ടെലികോം,
- നാഷണൽ കൊമേഴ്‌ഷ്യൽ ബാങ്ക്,
- ഗൾഫ് ഇന്റർനാഷണൽ ബാങ്ക്,
- ഏവിയേഷൻ ലീസിംഗ് കമ്പനികൾ എന്നിവയുടെ മികച്ച പ്രകടനം.
ഇതിനുപുറമേ, ചില പ്രധാന പദ്ധതികളിൽ നിന്നുള്ള സ്ഥിരവരുമാനവും വരുമാനവർധനയ്ക്കു വഴിതുറന്നു.
2024ൽ PIF 26 ശതകോടി റിയാൽ അറ്റാദായം നേടി. ആഗോള സാമ്പത്തിക വെല്ലുവിളികൾ, പലിശനിരക്കുകൾ ഉയർന്നത്, പണപ്പെരുപ്പം തുടങ്ങിയ ഘടകങ്ങൾ അറ്റാദായത്തെ ബാധിച്ചുവെങ്കിലും, ഫണ്ട് സ്ഥിരത പുലർത്തുകയായിരുന്നു.
പുതിയ മേഖലകളിൽ നീക്കം
നിക്ഷേപതലത്തിൽ ടൂറിസം, വിനോദം തുടങ്ങി നിരവധി പുതിയ മേഖലകളിൽ ഫണ്ട് ശ്രദ്ധേയമായ പുരോഗതി കൈവരിച്ചു. നിരവധി പുതിയ കമ്പനികളും പദ്ധതികളും ആരംഭിച്ചതായും അതിലൂടെ വരുമാനം വർദ്ധിച്ചതായും റിപ്പോർട്ടിൽ വ്യക്തമാക്കുന്നു.
