ദമ്മാം: സൗദി അറേബ്യയുടെ കിഴക്കൻ പ്രവിശ്യയിൽ ലോകതലത്തിലുള്ള ആധുനിക ലോജിസ്റ്റിക്സ് കേന്ദ്രം സ്ഥാപിക്കാൻ നീക്കം. സർക്കാർ-സ്വകാര്യ പങ്കാളിത്തത്തിലായുള്ള ഈ വിപുലമായ പദ്ധതിയിൽ 66 കമ്പനിയുടെയും കൺസോർഷ്യങ്ങളുടെയും സഹകരണമുണ്ടാകും. രാജ്യത്തെ ലോജിസ്റ്റിക്സ് മേഖലയെ വളർത്തുന്നതിനും ആഗോള വ്യാപാര മാപ്പിൽ സുപ്രധാന സ്ഥാനമുറപ്പിക്കുന്നതിനും ഇത് വഴിതെളിയുമെന്ന് പ്രതീക്ഷിക്കുന്നു.
നാഷണൽ സെന്റർ ഫോർ പ്രൈവറ്റൈസേഷന്റെ (NCP) നേതൃത്വത്തിലാണ് ഈ പദ്ധതി മുന്നോട്ടു പോകുന്നത്. ദമ്മാം സെക്കൻഡ് ഇൻഡസ്ട്രിയൽ സിറ്റിയിലുള്ള എട്ടര ലക്ഷം ചതുരശ്ര മീറ്റർ വിസ്തൃതിയിലുള്ള സ്ഥലത്താണ് നിർമ്മാണം നടക്കുക. അത്യാധുനിക സൗകര്യങ്ങളും വൻ സംഭരണശേഷിയുമുള്ള ലോജിസ്റ്റിക്സ് സേവനങ്ങളെ ഏകീകരിക്കുകയും ഗതാഗതം, സംഭരണം, വിതരണം തുടങ്ങിയ മേഖലകളിൽ കാര്യക്ഷമത വർധിപ്പിക്കുകയും ചെയ്യുന്നതാണ് പുതിയ കേന്ദ്രത്തിന്റെ പ്രധാന ലക്ഷ്യം. പദ്ധതിയുടെ നടപ്പാക്കലിലൂടെ സൗദി അറേബ്യയുടെ സാമ്പത്തിക വളർച്ചക്കും അന്താരാഷ്ട്ര വ്യാപാര ബന്ധങ്ങൾക്കും വലിയ ഉണർവുണ്ടാകുമെന്ന കാര്യത്തിൽ സർക്കാർ പ്രതീക്ഷയിലാണ്.
66 ലധികം പ്രമുഖ കമ്പനികൾ ഇതിനകം തന്നെ പങ്കാളിത്തത്തിനുള്ള താൽപര്യവും നിക്ഷേപ സൗകര്യങ്ങളും രേഖപ്പെടുത്തി കഴിഞ്ഞതായി എൻസിപി അറിയിച്ചു.
